Յիսուսի փորձութիւնը

1Այն ատեն Յիսուս անապատը տարուեցաւ Սուրբ Հոգիէն, որպէս զի սատանայէ փորձուի. 2Եւ քառասուն ցորեկ ու քառասուն գիշեր ծոմ պահելէն ետքը անօթեցաւ։ 3Եւ փորձողը անոր մօտենալով՝ ըսաւ, Եթէ դուն Աստուծոյ Որդին ես, ըսէ որ այս քարերը հաց ըլլան։ 4Անիկա պատասխան տուաւ ու ըսաւ, Գրուած է թէ Ոչ միայն հացով կ’ապրի մարդ, հապա այն ամէն խոսքով՝ որ Աստուծոյ բերնէն կ’ելլէ։ 5Այն ատեն սատանայ առաւ տարաւ զանիկա սուրբ քաղաքը, և կայնեցուց զանիկա տաճարին աշտարակին վրայ, 6Ու ըսաւ անոր, Եթէ դուն Աստուծոյ Որդին ես, քեզ ասկէ վար ձգէ, վասն զի գրուած է թէ Իր հրեշտակներուն պիտի ապսպրէ քեզի համար, ու ձեռքերնուն վրայ պիտի վերցնեն քեզ, որպէս զի չըլլայ թէ ոտքդ քարի զարնես։ 7Յիսուս ըսաւ անոր, Դարձեալ գրուած է թէ Քու Տէր Աստուածդ չփորձես։ 8Սատանայ նորէն առաւ հանեց զանիկա խիստ բարձր լեռան մը վրայ, և ցուցուց անոր աշխարհի բոլոր թագաւորութիւնները ու անոնց փառքը. 9Ու ըսաւ անոր, Ասոնք ամէնը քեզի կուտամ, եթէ իյնաս՝ ինծի երկրպագութիւն ընես։ 10Այն ատեն Յիսուս ըսաւ անոր, [Ետիս] գնա, սատանայ, վասն զի գրուած է թէ Քու Տէր Աստուծոյդ երկրպագութիւն ընես, ու միայն զանիկա պաշտես։ 11Այն ատեն սատանայ զանիկա թողուց. և ահա հրեշտակներ եկան ու անոր սպասավորութիւն կ’ընէին։

Յիսուս Գալիլիոյ մէջ իր գործը կը սկսի

12Եւ երբ լսեց Յիսուս թէ Յովհաննէս մատնուեցաւ, ելաւ գնաց Գալիլեա, 13Ու ձգելով Նազարէթը, եկաւ բնակեցաւ Կափառնայում, ծովեզերեայ քաղաքը, Զաբուղոնի ու Նեփթաղիմի սահմաններուն մէջ. 14Որպէս զի կատարուի Եսայի մարգարէին ձեռքով ըսուած խօսքը, 15Զաբուղոնի երկիրը ու Նեփթաղիմի երկիրը, ծովու ճամբով Յորդանանու անդիի կողմը, Հեթանոսաց Գալիլեան. 16Խաւարի մէջ նստող ժողովուրդը մեծ լոյս տեսաւ, եւ լոյս ծագեցաւ անոնց՝ որոնք մահուան երկրին ու շուքին մէջ կը նստէին։ 17Անկէ ետև Յիսուս սկսաւ քարոզել ու ըսել, Ապաշխարեցէք, վասն զի երկինքի թագաւորութիւնը մօտ է։

Յիսուս չորս ձկնորսներ կը կանչէ

18Երբ Յիսուս Գալիլեացւոց ծովուն քովերը կը պտըտէր, տեսաւ երկու եղբայրներ, Պետրոս կոչուած Սիմոնը և անոր եղբայրը Անդրէասը, որոնք ծովը ուռկան կը ձգէին, վասն զի ձկնորս էին. 19Եւ ըսաւ անոնց, Իմ ետևէս եկէք, ու ձեզ մարդոց որսորդ ընեմ։ 20Անոնք ալ շուտ մը ուռկանները թողուցին ու անոր ետևէն գացին։ 21Եւ անկէ յառաջ երթալով՝ տեսաւ ուրիշ երկու եղբայրներ, Զեբեդեան Յակոբոսը ու անոր եղբայրը Յովհաննէսը, նաւին մէջ իրենց հօրը Զեբեդէոսի հետ, երբ իրենց ուռկանները կը կարկտէին. ու կանչեց զանոնք. 22Անոնք ալ շուտ մը նաւը ու հայրերնին թողուցին ու անոր ետևէն գացին։ կը բժշկէ (Ղուկ. 6:17-19)

Յիսուս կը սորվեցնէ, կը քարոզէ,

23Եւ Յիսուս բոլոր Գալիլեա պտըտելով, կը սորվեցնէր անոնց ժողովարաններուն մէջ, և արքայութեան աւետարանը կը քարոզէր, ու ժողովուրդին մէջի ամէն կերպ հիւանդութիւնները ու ամէն կերպ ցաւերը կը բժշկէր։ 24Եւ անոր համբաւը բոլոր Սուրիա տարածուեցաւ, և բերին անոր՝ բոլոր հիւանդները որոնք կերպ կերպ ցաւերով ու տանջանքներով կը նեղուէին, և դիւահարները ու լուսնոտները և անդամալոյծները. ու բժշկեց զանոնք։ 25Եւ շատ ժողովուրդներ անոր ետևէն կ’երթային, Գալիլեայէ ու Դեկապոլիսէ և Երուսաղէմէ ու Հրէաստանէ և Յորդանանու անդիի կողմէն։