Ուրիշները դատել

1Մի դատէք, որպէս զի չդատուիք։ 2Քանզի ի՛նչ դատաստանով որ դատէք, անով պիտի դատուիք, և ի՛նչ չափով որ չափէք, անով պիտի չափուի ձեզի։ 3Եւ ինչո՞ւ քու եղբօրդ աչքին մէջի շիւղը կը տեսնես, ու քու աչքիդ մէջի գերանին չես նայիր։ 4Կամ ի՞նչպէս կրնաս ըսել քու եղբօրդ, Թող տուր աչքէդ շիւղը հանեմ. և ահա քու աչքիդ մէջ գերան կայ։ 5Կեղծաւոր, առաջ քու աչքէդ գերանը հանէ, ու ետքը պարզ պիտի տեսնես եղբօրդ աչքէն շիւղը հանելու։ 6Սուրբ բանը շուներուն մի տաք, և ձեր մարգարիտները խոզերուն առջև մի ձգէք, որպէս զի ոտքերնուն տակ չկոխկռտեն զանոնք, ու դառնան ձեզ պատառեն։

Խնդրել, փնտռել, զարնել

7Խնդրեցէք, և պիտի տրուի ձեզի, փÁնտռեցէք, և պիտի գտնէք. դուռը զարկէք, և պիտի բացուի ձեզի. 8Վասն զի ամէն ով որ կը խնդրէ՝ կ’առնէ, և ով որ կը փնտռէ՝ կը գտնէ, և ով որ դուռը կը զարնէ՝ պիտի բացուի անոր։ 9Ձեզմէ ո՞ր մարդը կայ՝ որմէ իր որդին եթէ հաց ուզէ, միթէ քա՞ր պիտի տայ անոր. 10Եւ կամ եթէ ձուկ ուզէ, միթէ օ՞ձ պիտի տայ անոր։ 11Ուստի եթէ դուք որ չար էք, ձեր զաւակներուն աղէկ ընծաներ տալ գիտէք, ո՛րչափ աւելի ձեր Հայրը որ երկինքն է, բարի բաներ պիտի տայ անոնց որ իրմէ կը խնդրեն։ 12Ուստի ամէն ինչ որ կ’ուզէք որ մարդիկ ձեզի ընեն, դուք ալ անոնց այնպէս ըրէք, քանզի այս է օրէնքը ու մարգարէները։

Նեղ դուռ

13Նեղ դռնէն ներս մտէք. վասն զի լայն է այն դուռը ու ընդարձակ՝ այն ճամբան, որ դէպ ի կորուստ կը տանի. և շատուոր են անոնք որ անկէ կը մտնեն։ 14Վասն զի նեղ է այն դուռը ու նեղուացք է այն ճամբան, որ դէպ ի կեանք կը տանի. և քիչուոր են անոնք որ զանիկա կը գտնեն։

Ծառը և իր պտուղը

15Զգոյշ կեցէք սուտ մարգարէներէն, որոնք ձեզի կու գան ոչխարի հանդերձներով, բայց ներսէն յափշտակող գայլեր են։ 16Իրենց պտուղէն պիտի ճանչնաք զանոնք. միթէ փուշերէն խաղող կը քաղե՞ն, կամ տատասկէն թուզ։ 17Այսպէս ամէն բարի ծառ բարի պտուղ կուտայ, և չար ծառ չար պտուղ կուտայ։ 18Բարի ծառը չկրնար չար պտուղ տալ, ոչ ալ չար ծառը բարի պտուղ տալ։ 19Ամէն ծառ որ բարի պտուղ չտար, կը կտրուի ու կրակը կը ձգուի։ 20Ուրեմն իրենց պտուղէն պիտի ճանչնաք զանոնք։

Ձեզ երբեք չեմ ճանչնար

21Ոչ թէ ամէն մէկը որ ինծի Տէր, Տէր, կ’ըսէ, պիտի մտնէ երկինքի թագաւորութիւնը, հապա անիկա՝ որ իմ երկնաւոր Հօրս կամքը կը կատարէ։ 22Շատերը այն օրը ինծի պիտի ըսեն, Տէր, Տէր, չէ՞ որ քու անունովդ մարգարէութիւն ըրինք, և քու անունովդ դևէր հանեցինք, ու քու անունովդ շատ հրաշքներ ըրինք։ 23Եւ այն ատեն անոնց յայտնապէս պիտի ըսեմ թէ Ես բնաւ ձեզ չէի ճանչնար. մէկդի գացէք քովէս դուք որ անօրէնութիւն կը գործէիք։

Երկու տուն շինողները

24Արդ ով որ այս իմ խօսքերս կը լսէ և կը կատարէ զանոնք, զանիկա պիտի նմանցնեմ խելացի մարդու մը՝ որ իր տունը վէմի վրայ շինեց. 25Եւ անձրև իջաւ ու գետերը վազեցին ու հովերը փչեցին, և զարկին այն տանը, ու չփլաւ, վասն զի վէմի վրայ հաստատուած էր։ 26Եւ ով որ այս իմ խօսքերս կը լսէ ու չկատարեր զանոնք, կը նմանի անխելք մարդու մը՝ որ իր տունը աւազի վրայ շինեց. 27Եւ անձրև իջաւ ու գետերը վազեցին ու հովերը փչեցին, և զարկին այն տանը, ու փլաւ, և մեծ էր անոր կործանումը։

Յիսուսի հեղինակութիւնը

28Ու երբ Յիսուս լմնցուց այս խօսքերը, ժողովուրդները կը զարմանային անոր վարդապետութեանը վրայ. 29Վասն զի իշխանութիւն ունեցողի մը պէս կը սորվեցնէր անոնց, ու ոչ թէ դպիրներուն պէս։