Յիսուս բորոտ մը կը բժշկէ

1Ու երբ այն լեռնէն վար իջաւ, շատ ժողովուրդներ գացին անոր ետևէն։ 2Եւ ահա բորոտ մը եկաւ, երկրպագութիւն կ’ընէր անոր ու կ’ըսէր, Տէր, եթէ ուզես, կրնաս զիս մաքրել։ 3Եւ Յիսուս իր ձեռքը երկնցնելով դպաւ անոր ու ըսաւ, Կ’ուզեմ, մաքրուէ, և շուտ մը անոր բորոտութիւնը մաքրուեցաւ։ 4Եւ Յիսուս ըսաւ անոր, Զգոյշ կեցիր, մարդո՛ւ չըսես, հապա գնա, քեզ քահանային ցուցուր, և Մովսէսի պատուիրած ընծան տուր, անոնց վկայութիւն ըլլալու համար։

Հարիւրապետին ծառայի բժշկուիլը

5Ու երբ Կափառանայում մտաւ, հարիւրապետ մը եկաւ քովը, կ’աղաչէր անոր, 6Ու կ’ըսէր, Տէր, իմ ծառաս տունը անդամալոյծ պառկած չարաչար կը տանջուի։ 7Եւ Յիսուս ըսաւ անոր, Ես կու գամ ու զանիկա կը բժշկեմ։ 8Եւ հարիւրապետը պատասխան տալով՝ ըսաւ, Տէր, ես արժանի չեմ որ դուն իմ յարկիս տակ մտնես. միայն թէ խօսքով զրուցէ, ու իմ ծառաս պիտի բժշկուի։ 9Վասն զի ես ալ իշխանութեան տակ մարդ մըն եմ, ու իմ հրամանիս տակ զինուորներ ունիմ. և ասոր կ’ըսեմ, Գնա, ու կ’երթայ. և միւսին՝ թէ Եկուր, ու կուգայ. և ծառայիս՝ թէ Այս բանը ըրէ, ու կ’ընէ։ 10Յիսուս երբ լսեց, զարմացաւ, և իր ետևէն գացողներուն ըսաւ, Ճշմարիտ կ’ըսեմ ձեզի, Իսրայէլի մէջ անգամ ես այսչափ հաւատք չգտայ։ 11Եւ ձեզի կ’ըսեմ որ արեւելքէն ու արևմուտքէն շատեր պիտի գան, ու երկինքի թագաւորութեանը մէջ պիտի բազմին Աբրահամի ու Իսահակի և Յակոբի հետ. 12Իսկ թագաւորութեանը որդիները դուրսի խաւարը պիտի հանուին. հոն պիտի ըլլայ լալ ու ակռաներ կրճտել։ 13Եւ Յիսուս հարիւրապետին ըսաւ, Գնա, ու ինչպէս դուն հաւատացիր, այնպէս թող ըլլայ քեզի, և նոյն ժամուն անոր ծառան բժշկուեցաւ։ 14Եւ Յիսուս Պետրոսի տունը գալով, տեսաւ որ անոր զոքանչը ջերմէն բռնուած՝ պառկած էր. 15Եւ անոր ձեռքէն բռնեց, ու ջերմը թող տուաւ զանիկա. ան ալ ոտքի վրայ ելաւ և անոնց սպասաւորութիւն կ’ընէր։ 16Երբ իրիկուն եղաւ, շատ դիւահարներ բերին անոր, ու խօսքով հանեց չար ոգիները և բոլոր հիւանդները բժշկեց. 17Որպէս զի Եսայի մարգարէին ձեռքով ըսուած խօսքը կատարուի, Անիկա մեր հիւանդութիւնները վերցուց և մեր ցաւերը կրեց։

Յիսուսի ինքնակոչ հետևորդները

18Յիսուս իր բոլորտիքը շատ ժողովուրդ տեսնելով, հրաման ըրաւ որ միւս կողմը երթան։ 19Եւ դպիր մը մօտենալով՝ ըսաւ անոր, Վարդապետ, ես քու ետևեդ պիտի գամ ուր որ երթաս։ 20Եւ Յիսուս ըսաւ անոր, Աղուէսները որջեր ունին, ու երկինքի թռչունները բոյներ, բայց Որդին մարդոյ տեղ մը չունի, ուր իր գլուխը դնէ։ 21Եւ մէկ ուրիշը, որ անոր աշակերտներէն էր, ըսաւ անոր, Տէր, ինծի հրաման տուր, որ երթամ առաջ իմ հայրս թաղեմ։ 22Յիսուս ըսաւ անոր, Եկուր իմ ետևէս, ու թող տուր մեռելներուն որ թաղեն իրենց մեռելները։

Յիսուս փոթորիկը կը խաղաղեցնէ

23Ու երբ նաւը մտաւ, իր աշակերտները իր ետևէն գացին. 24Եւ ահա մեծ ալէկոծութիւն մը եղաւ ծովուն մէջ, այնպէս որ նաւը ալիքներէն կը ծածկուէր. իսկ ինք կը քնանար։ 25Եւ աշակերտները մօտ գացին, արթնցուցին զանիկա ու ըսին, Տէր, ազատէ մեզ, ահա կը կորսուինք։ 26Եւ ըսաւ անոնց, Թերահաւատներ, ինչո՞ւ այդպէս վախկոտ էք. այն ատեն ելաւ հովերուն ու ծովուն սաստեց, և մեծ խաղաղութիւն եղաւ։ 27Ու մարդիկը զարմացան և կ’ըսէին, Ի՜նչպիսի մարդ է աս որ հովերը ու ծովը ասոր կը հնազանդին։

Յիսուս երկու դիւահարներ կը բժշկէ

28Ու երբ միւս կողմը Գերգեսացւոց երկիրը անցաւ, երկու դիւահար պատահեցան իրեն գերեզմաններէն ելած՝ սաստիկ կատղած, այնպէս որ հնար չէր մարդու այն ճամբայէն անցնիլ։ 29Եւ ահա աղաղակեցին ու ըսին, Յիսուս, Որդի Աստուծոյ, դուն մեզի հետ ի՞նչ բան ունիս, ատենէն առաջ մեզ տանջելո՞ւ համար հոս եկար։ 30Եւ անոնցմէ հեռու շատ խոզերու երամակ մը կար, որոնք կ’արածուէին։ 31Ու դևերը կ’աղաչէին իրեն ու կ’ըսէին, Եթէ մեզ կը հանես, հրաման տուր մեզի որ երթանք խոզերուն երամակին մէջ մտնենք։ 32Եւ ըսաւ անոնց, Գացէք. ու անոնք ելան գացին խոզերուն երամակին մէջ մտան, և ահա բոլոր երամակը գահավէժ տեղէն ծովը վազեցին, ու ջուրերուն մէջ մեռան։ 33Խոզարածներն ալ փախան, և քաղաքը երթալով բոլորը պատմեցին, ու դիւահարներուն պատահած բաները։ 34Եւ ահա բոլոր քաղաքը Յիսուսի դէմը ելաւ, ու երբ տեսան զանիկա, աղաչեցին որ իրենց սահմաններէն երթայ։