Յիսուս անդամալոյծ կը բժշկէ

1Եւ նաւը մտնելով անդիի կողմը անցաւ, ու եկաւ իր քաղաքը։ 2Եւ ահա բերին իրեն անդամալոյծ մը, որ մահիճի մէջ պառկած էր. և Յիսուս անոնց հաւատքը տեսնելով, ըսաւ անդամալոյծին, Քաջալերուէ, որդեակ, քու մեղքերդ քեզի ներուած են։ 3Եւ ահա դպիրներէն ոմանք իրենց միտքին մէջ ըսին, Ատիկա հայհոյութիւն կ’ընէ։ 4Յիսուս ալ անոնց խորհուրդները իմանալով՝ ըսաւ, Ինչո՞ւ սիրտերնուդ մէջ չար բաներ կը խորհիք։ 5Քանզի ո՞րը աւելի դիւրին է. Քու մեղքերդ ներուած են՝ ըսե՞լը, թէ Ելիր ու քալէ՝ ըսելը։ 6Բայց որպէս զի գիտնաք թէ Որդին մարդոյ իշխանութիւն ունի երկրի վրայ մեղքերու թողութիւն տալու, (այն ատեն անդամալոյծին ըսաւ,) Ելիր, մահիճդ առ ու տունդ գնա։ 7Ու անիկա ելաւ իր տունը գնաց։ 8Ժողովուրդները երբ տեսան, զարմացան, ու փառաւորեցին զԱստուած, որ մարդոց այնպիսի իշխանութիւն տուեր էր։

Յիսուս Մատթէոսը կը կանչէ

9Եւ Յիսուս անկէ առաջ անցնելով՝ մարդ մը տեսաւ Մատթէոս անունով, որ մաքս ընդունելու տեղը նստեր էր, ու ըսաւ անոր, Ետևէս եկուր. ան ալ ելաւ անոր ետևէն գնաց։ 10Ու եղաւ որ տունը սեղան նստած ատենը՝ ահա ուրիշ շատ մաքսաւորներ և մեղաւորներ եկած ու սեղան նստած էին Յիսուսի ու անոր աշակերտներուն հետ։ 11Ու փարիսեցիները երբ տեսան, ըսին անոր աշակերտներուն, Ինչո՞ւ ձեր վարդապետը մաքսաւորներուն ու մեղաւորներուն հետ կ’ուտէ։ 12Բայց Յիսուս երբ լսեց՝ ըսաւ անոնց, Առողջներուն բժիշկ պետք չէ, հապա հիւանդներուն։ 13Գացէք սորվեցէք թէ ի՛նչ է այս խօսքը, Ողորմութիւն կ’ուզեմ և ոչ թէ զոհ. վասն զի ես արդարները կանչելու չեկայ, հապա մեղաւորները ապաշխարութեան։

Ծոմապահութեան հարցը

14Այն ատեն Յովհաննէսի աշակերտները անոր եկան ու ըսին, Ինչո՞ւ մենք ու փարիսեցիները շատ անգամ ծոմ կը պահենք, և քու աշակերտներդ չեն պահեր։ 15Ու Յիսուս ըսաւ անոնց, Միթէ կարելի՞ է որ հարսնիքին տղաքը սուգ պահեն, քանի որ փեսան իրենց հետ է. բայց օրեր պիտի գան որ երբ փեսան իրենցմէ վերցուի, այն ատեն ծոմ պիտի պահեն։ 16Ու մէկը չձգէր նոր լաթի կտոր հին հանդերձի վրայ, քանզի այն որ անոր լրութեանը համար դրուած է, կ’առնէ հանդերձէն, ու պատռուածքը ա՛լ աւելի գէշ կ’ըլլայ: 17Ոչ ալ նոր գինին հին տիկերու մէջ կը դնեն. եթէ ոչ՝ տիկերը կը պատռին ու գինին կը թափի, և տիկերը կը կորսուին. հապա նոր գինին նոր տիկերու մէջ կը դնեն, ու երկուքն ալ կը պահուին։

Իշխանին աղջիկը և հանդերձին դպչող կինը

18Երբ անիկա անոնց հետ այս բաները կը խօսէր, ահա իշխան մը եկաւ, երկրպագութիւն կ’ընէր անոր ու կ’ըսէր, Աղջիկս ա՛լ մինչև հիմա մեռած է, բայց եկուր ձեռքդ անոր վրայ դիր, ու պիտի ապրի։ 19Եւ Յիսուս ելաւ ու իր աշակերտներուն հետ անոր ետևէն գնաց։ 20Եւ ահա տասուերկու տարուան տեռատես կին մը մօտեցաւ ետեւէն, անոր հանդերձին քղանցքին դպաւ. 21Քանզի իր միտքին մէջ կ’ըսէր, Եթէ միայն անոր հանդերձին դպչիմ, պիտի բժշկուիմ. 22Բայց Յիսուս երբ ետին դարձաւ ու տեսաւ զանիկա, ըսաւ, Քաջալերուէ, աղջիկ, քու հաւատքդ քեզ բժշկեց. և կինը նոյն ժամէն բժշկուեցաւ։ 23Ու երբ Յիսուս իշխանին տունը եկաւ, ու տեսաւ փողահարները և խռոված բազմութիւնը, 24Ըսաւ անոնց, Մէկդի գացէք, վասն զի աղջիկը մեռած չէ, հապա կը քնանայ. և ծաղր կ’ընէին զանիկա։ 25Ու երբ բազմութիւնը դուրս ձգուեցաւ, ինք ներս մտաւ, անոր ձեռքէն բռնեց, ու աղջիկը ոտք ելաւ։ 26Եւ այս լուրը բոլոր երկիրը տարածուեցաւ։

Յիսուս երկու կոյրեր կը բժշկէ

27Ու երբ Յիսուս անկէ՝ առաջ անցաւ, երկու կոյր ինկան անոր ետեւէն, կաղաղակէին ու կ’ըսէին, Ողորմէ մեզի, Որդի Դաւթի։ 28Ու երբ տուն եկաւ, կոյրերը իրեն եկան. և Յիսուս անոնց ըսաւ, Կը հաւատա՞ք թէ կրնամ այս բանը ձեզի ընել, ըսին անոր, Այո, Տէր։ 29Այն ատեն անոնց աչքերուն դպաւ ու ըսաւ, Ձեր հաւատքին պէս ըլլայ ձեզի։ 30Ու անոնց աչքերը բացուեցան. և Յիսուս սաստիկ պատուէր տուաւ անոնց ու ըսաւ, Զգոյշ կեցէք, մէ՛կը չիմանայ։ 31Բայց անոնք ելան, այն բոլոր երկրին մէջ անոր համբաւը տարածեցին։

Յիսուս համր մը կը բժշէ

32Եւ երբ անոնք դուրս ելան, ահա համր դիւահար մարդ մը բերին իրեն։ 33Ու երբ դևը ելաւ, համրը խօսեցաւ. և ժողովուրդները զարմացան ու կ’ըսէին թէ Իսրայէլի մէջ բնաւ այսպիսի բան մը տեսնուած չէ։ 34Բայց փարիսեցիները կ’ըսէին թէ Ատիկա դևերուն իշխանովը դևերը կը հանէ։

Յիսուս բազմութեան վրայ կը խղճայ

35Եւ Յիսուս կը պտըտէր բոլոր քաղաքները ու գեղերը, և անոնց ժողովարաններուն մէջ կը սորվեցնէր ու կը քարոզէր արքայութեան աւետարանը, և կը բժշկէր բոլոր ախտերը ու բոլոր հիւանդութիւնները ժողովուրդին մէջ։ 36Եւ ժողովուրդները տեսնելով, անոնց վրայ խղճաց, վասն զի յոգնած ու ցիրուցան եղած էին հովիւ չունեցող ոչխարներու պէս։ 37Այն ատեն ըսաւ իր աշակերտներուն, Հունձքը շատ է, բայց մշակները քիչ: 38Ուստի հունձքին Տէրոջը աղաչեցէք, որ մշակներ հանէ իր հունձքին։