1Տէրոջը խօսքը, որ Յուդայի թագաւորներուն, Յովաթամի, Աքազի ու Եզեկիայի օրերը Մօրստացի Միքիայի եղաւ, և Սամարիայի ու Երուսաղէմի վրայով անոր յայտնուեցաւ:

Ողբ մը Սամարիայի և Երուսաղէմի համար

2Լսեցէք, ով բոլոր ժողովուրդներ, Մտիկ ըրէ, ով երկիր, ու անոր բոլոր բնակիչները*. Եւ Տէր Եհովա ձեզի դէմ վկայ ըլլայ, Տէրը ինք իր սուրբ տաճարէն, 3Քանզի ահա Տէրը իր տեղէն կ’ելլէ, Եւ պիտի իջնէ ու երկրի բարձր տեղերուն վրայ պիտի պտըտի: 4Ու լեռները անոր տակ պիտի հալին, Եւ հովիտները պիտի պատռին` Կրակին առջև հալած մոմի պէս Ու զառ ի վայրէն թափուած ջուրի պէս: 5Այս ամէնը Յակոբի յանցանքին համար Ու Իսրայէլի տանը մեղքին համար է. Յակոբի յանցանքին պատճառը ո՞վ է. Սամարիա չէ՞. Եւ Յուդայի բարձր տեղերուն պատճառը ո՞վ է. Երուսաղէմ չէ՞: 6Ուստի Սամարիան դաշտի քարակոյտի Ու այգի տնկելու տեղի պիտի դարձնեմ, Անոր քարերը ձորին մէջ պիտի գլորեմ, Ու անոր հիմերը պիտի բանամ. 7Եւ անոր բոլոր կուռքերը պիտի կոտըրտին, Ու անոր բոլոր նուիրուած բաները կրակով պիտի այրին, Եւ անոր բոլոր արձանները բնաջինջ պիտի ընեմ. Քանզի անոնք բոզի վարձքով ժողվեց, Ու բոզի վարձքի պիտի դառնան: 8Ասոր համար պիտի ողբամ ու պիտի հառաչեմ, Անծածկոյթ ու մերկ պիտի շրջիմ. Չագալներու պէս կոծ, ու ջայլամներու պէս սուգ պիտի ընեմ: 9Քանզի անոր վէրքերը անբժշկելի են, Քանզի մինչև Յուդա եկաւ, Մինչև իմ ժողովուրդիս դուռը, մինչև Երուսաղէմ, հասաւ:

Թշնամին Երուսաղէմին կը մօտենայ

10Գէթի մէջ մի պատմէք ու բնաւ մի լաք. Բեթափրայի մէջ փոշիի մէջ թաւալէ: 11Ով Սափիրի բնակիչ, քու մերկութիւնդ բաց ունենալով անցիր. Սաանանի բնակիչը դուրս չելլեր, Բեթեսելի կոծը իր օթևանը ձեզմէ կ’առնէ: 12Վասն զի Մարօթի բնակիչը բարիքի համար կը վշտանայ. Քանզի մինչև Երուսաղէմի դուռը Տէրոջմէ չարիք իջաւ: 13Երիւարը կառքին լծէ, ով Լաքիսի բնակիչ. Սիօնի աղջկան մեղքին սկիզբը անիկա է. Քանզի քու մէջդ Իսրայէլի յանցանքները գտնուեցան: 14Անոր համար Մօրեսեթ-գէթի ընծաներ պիտի տաս. Աքեզիբի տուները Իսրայէլի թագաւորներուն պիտի ստեն: 15Տակաւին քեզի ժառանգ պիտի բերեմ, ով Մարեսայի բնակիչ. Իսրայէլի փառքը մինչև Ոդողոմ պիտի հասնի: 16Քու սիրելի որդիներուդ համար մազերդ փետէ ու կտրէ, Կնտութիւնդ արծիւի պէս շատցուր, Քանզի քեզմէ գերութեան գացին: