Յարութիւնը

1Ու երբ շաբաթը անցաւ, Մարիամ Մագդաղենացի և Յակոբոսի մայրը Մարիամ և Սողովմէ խունկեր ծախու առին, որպէս զի գան օծեն զանիկա։ 2Եւ մէկշաբթի առտուանց շատ կանուխ, երբ արևը կը ծագէր, եկան գերեզմանը, 3Ու իրարու կ’ըսէին, Քարը ո՞վ պիտի գլորէ մեզի գերեզմանին դռնէն, 4(Ու նայեցան տեսան որ քարը գլորուած էր,) վասն զի շատ մեծ էր: 5Եւ ներս գերեզմանը մտնելով՝ երիտասարդ մը տեսան որ աջ կողմը նստեր էր ճերմակ պատմուճան հագած, ու զարհուրեցան։ 6Եւ անիկա ըսաւ անոնց, Մի զարհուրիք. Յիսուս Նազովրեցին կը փնտռէք, որ խաչուեցաւ. անիկա յարութիւն առաւ. հոս չէ. ահա այն տեղը ուր դրին զանիկա։ 7Բայց գացէք, ըսէք անոր աշակերտներուն և Պետրոսի, թէ ահա ձեզմէ առաջ Գալիլեա կ’երթայ, հոն պիտի տեսնէք զանիկա՝ ինչպէս ձեզի ըսաւ։ 8Եւ անոնք դողով ու ապշութեամբ բռնուած՝ ելան* ու փախան գերեզմանէն, և մարդո՛ւ բան չըսին, քանզի կը վախնային։

Յիսուս Մարիամ Մագդաղենացիին կ’երեւի

9Յիսուս մէկշաբթի առտուանց յարութիւն առած՝ առաջ Մարիամ Մագդաղենացիի երևցաւ, որմէ եօթը դև հաներ էր։ 10Անիկա գնաց անոնց պատմեց՝ որոնք անոր հետ էին, երբ սուգ կ’ընէին ու կու լային։ 11Իսկ անոնք երբ լսեցին թէ կենդանի է և թէ իրեն երևցաւ, չհաւատացին։

Յիսուս երկու աշակերտներու կ’երեւի

12Ետքը ուրիշ կերպարանքով երևցաւ անոնցմէ երկուքին՝ որոնք քալելով արտը կ’երթային։ 13Եւ անոնք գացին ուրիշներուն պատմեցին, ու անոնց ալ չհաւատացին։ Յովհ. 20:19-23, Գործ. 1:6-8)

Յիսուս տասնըմէկին կ’երեւի

14Վերջը տասնըմէկին երևցաւ, երբ սեղան նստած էին, ու երեսնին զարկաւ իրենց անհաւատութիւնը և սիրտերնուն կարծրութիւնը, վասն զի որոնց որ ինք երևցաւ մեռելներէն յարութիւն առած՝ իրենք չհաւատացին։ 15Եւ ըսաւ անոնց, Գացէք բոլոր աշխարհ, ու աւետարանը քարոզեցէք բոլոր ստեղծուածներուն։ 16Ան որ հաւատայ ու մկրտուի՝ պիտի փրկուի, և ան որ չհաւատայ՝ պիտի դատապարտուի։ 17Եւ անոնք որ կը հաւատան, այս նշանները անոնց հետ պիտի երթան. Իմ անունովս դևեր պիտի հանեն, նոր լեզուներ պիտի խօսին. 18Ձեռքերնին օձեր պիտի բռնեն, և եթէ մահառիթ դեղ մը խմեն, իրենց պիտի չվնասէ. հիւանդներու վրայ ձեռք պիտի դնեն, ու անոնք պիտի առողջանան։ (Ղուկ. 24:50-53, Գործ. 1:9-11)

Յիսուս համբարձաւ

19Արդ Տէրը անոնց հետ խօսելէն ետքը երկինք համբարձաւ, ու Աստուծոյ աջ կողմը նստաւ։ 20Եւ անոնք ելան ու ամէն տեղ կը քարոզէին, և Տէրը անոնց գործակից էր, ու խօսքը կը հաստատէր այն նշաններով որոնք անոնց հետ կ’երթային։ Ամէն։