Երուսաղէմի պարիսպին շինութիւնը

1Ու մեծ քահանան Եղիասիբ և անոր քահանայ եղբայրները ելան ու Ոչխարաց դուռը շինեցին. անոնք զանիկա նուիրեցին և անոր փեղկերը կանգնեցին. ու զանիկա մինչև Մէայի աշտարակը, մինչև Անանայէլի աշտարակը նուիրեցին: 2Եւ անոր քով Երիքովի մարդիկը շինեցին, ու անոնց քով Իմրիի որդին Զաքուր շինեց: 3Եւ Ձկանց դուռը Սենաայի որդիները շինեցին. անոնք զանիկա շինեցին, ու անոր փեղկերը, փականքը ու նիգերը անցուցին: 4Եւ անոնց քով Ակկուսի որդւոյն Ուրիայի որդին Մերամօթ նորոգեց, ու անոնց քով Մասիշեբէլի որդւոյն Բարաքիայի որդին Մեսուղամ նորոգեց. և անոնց քով Բաանայի որդին Սադովկ նորոգեց: 5Ու անոնց քով Թեկուացիք նորոգեցին. բայց անոնց մեծերը իրենց Տէրոջը գործին իրենց վիզը չծռեցին: 6Եւ Հին դուռը Փասէի որդին Յովիադա ու Բասոդիայի որդին Մեսուղամ նորոգեցին. անոնք զանիկա շինեցին, ու անոր փեղկերը, փականքը ու նիգերը անցուցին: 7Եւ անոնց քով Գաբաւոնացի Մելատիա ու Մերոնոթացի Յադոն և Գաբաւոնի ու Մասփայի մարդիկը շինեցին՝ մինչև Գետին այս կողմը եղող իշխանին աթոռը: 8Անոր քով ոսկերիչներէն Հարհայիայի որդին Ոզիէլ նորոգեց. ու անոր քով դեղագործներուն որդին Անանիա նորոգեց. ու Երուսաղէմը մինչև լայն պարիսպը թողուցին: 9Եւ անոնց քով Երուսաղէմի կէս մասին իշխանը, Ովրի որդին Հռափայիա, նորոգեց: 10Եւ անոնց քով ու իր տանը դիմացը Հարումափի որդին Յեդայիա նորոգեց. ու անոր քով Ասաբանիայի որդին Քետտուս նորոգեց: 11Միւս բաժինը ու Փուռերու աշտարակը Հարիմի որդին Մեղքիա ու Փաաթ-մովաբի որդին Ասուբ նորոգեցին: 12Եւ անոր քով Երուսաղէմի կէս մասին իշխանը, Ալօեսի որդին Սեղղում, ինք ու իր աղջիկները նորոգեցին. 13Ձորի դուռը Անոն ու Զանովի բնակիչները նորոգեցին. անոնք զանիկա շինեցին, ու անոր փեղկերը, փականքը ու նիգերը անցուցին. ու պարիսպէն հազար կանգուն շինեցին մինչև Աղբից դուռը: 14Եւ Աղբից դուռը Բեթաքարմայի կողմերու իշխանը, Ռեքաբի որդին Մեղքիա, նորոգեց. զանիկա ան շինեց, ու անոր փեղկերը, փականքը ու նիգերը անցուց: 15Եւ Աղբիւրի դուռը Մասփայի կողմերու իշխանը Քոլոզէի որդին Սեղղում նորոգեց. զանիկա ան շինեց ու ծածկեց, անոր փեղկերը, փականքը ու նիգերը անցուց. ու թագաւորի պարտէզին մօտ եղող Սիլովայի աւազանին պարիսպը մինչև Դաւիթի քաղաքէն իջնող աստիճանները շինեց: 16Անկէ ետքը Բեթսուրի կէս մասին իշխանը, Ազբուքի որդին Նէեմիա, նորոգեց մինչև Դաւիթի գերեզմաններուն դիմաց, ու մինչև շինծու աւազանը, ու մինչև Բեթագաբարին:

Ղեւտացիները, որ պարիսպին վրայ աշխատեցան

17Անկէ ետքը Ղեւտացիք նորոգեցին. Բանիի որդին Հռէում. անոր քով Կէիլայի կէս մասին իշխանը Ասաբիա իր տեղերը նորոգեց: 18Անկէ ետքը անոնց եղբայրները, Կէիլայի կէս մասին իշխանը, Ենադադի որդին Բաւայի, նորոգեց: 19Եւ անոր քով Մասփայի իշխանը, Յեսուի որդին Եզեր, միւս բաժինը նորոգեց, այսինքն պարսպին դարձուածքը, որ զինարանը ելլելու ճամբուն դիմաց է: 20Անկէ ետքը միւս բաժինը, պարսպին դարձուածքէն մինչև մեծ քահանային Եղիասիբի տանը դուռը, Զաբբայի որդին Բարուք փութով նորոգեց: 21Անկէ ետքը միւս բաժինը, Եղիասիբի տանը դռնէն մինչև Եղիասիբի տանը ծայրը, Ակկուսի որդւոյն Ուրիայի որդին Մերամօթ նորոգեց:

Քահանաները, որ պարիսպին վրայ աշխատեցան

22Եւ անկէ ետքը քահանաները, դաշտի բնակիչները, նորոգեցին: 23Ու անկէ ետքը Բենիամին ու Ասուբ իրենց տուներուն առջև նորոգեցին. անկէ ետքը Անանիայի որդւոյն Մաասիայի որդին Ազարիա իր տանը դիմաց նորոգեց: 24Անկէ ետքը միւս բաժինը, Ազարիայի տունէն մինչև պարսպին դարձուածքը, մինչև անկիւնը, Ենադադի որդին Բանուի նորոգեց: 25Եւ Ոզայի որդին Փաղաղ պարսպին դարձուածքին դիմաց ու բանտի գաւիթին քով եղող թագաւորին վերի պալատին դուրսի աշտարակը շինեց. ու անոր ետևէն Փարոսի որդին Փադայիա շինեց: 26Եւ Նաթանայիմները, որոնք Ոփաղ կը բնակէին, մինչև արեւելեան կողմը եղող Ջուրի դրանը դիմաց ու դուրսի աշտարակը նորոգեցին:

Ուրիշ շինողներ

27Անկէ ետքը միւս բաժինը, դուրսի մեծ աշտարակին դիմացէն մինչև Ոփաղի պարիսպը, Թեկուացիք նորոգեցին: 28Ձիերու դռնէն վեր քահանաները նորոգեցին, ամէն մարդ իր տանը դիմաց: 29Անկէ ետքը Եմմերի որդին Սադովկ իր տանը դիմաց նորոգեց. ու անկէ ետքը արևելեան դրանը պահապանը, Սեքենիայի որդին Սեմայիա, նորոգեց: 30Անկէ ետքը միւս բաժինը Սեղեմիայի որդին Անանիա ու Սեղեփի վեցերորդ որդին Անոն նորոգեցին. անկէ ետքը Բարաքիայի որդին Մեսուղամ իր սենեակին դիմաց նորոգեց: 31Անկէ ետքը Սարեփիի որդին Մեղքիա, մինչև Նաթանայիմներուն ու վաճառականաց տունը Մափկաթի դրանը դիմաց ու մինչև անկիւնը ելլելու տեղը*, նորոգեց: 32Եւ անկիւնը ելլելու տեղէն մինչև Ոչխարաց դուռը ոսկերիչները ու վաճառականները նորոգեցին: