Լրտեսները

1Եւ ետքը ժողովուրդը Ասերովթէ չուեցին, ու Փառանի անապատը իջեւան ըրին: 2Եւ Տէրը խօսեցաւ Մովսէսի` ըսելով, 3Մարդիկ ղրկէ որ լրտեսեն Քանանու երկիրը, զոր Իսրայէլի որդիներուն պիտի տամ. անոնց ամէն մէկը իշխան ըլլալով` մէյմէկ մարդ իր հայրերուն ցեղին կողմէն ղրկէք: 4Եւ Մովսէս Տէրոջը հրամանին համեմատ ղրկեց զանոնք Փառանի անապատէն. բոլոր այն մարդիկը Իսրայէլի որդիներուն գլխաւորներն էին, 5Որոնց աննունները ասոնք են. 6Ռուբէնի ցեղէն` Զաքուրի որդին Սամուա, Շմաւոնի ցեղէն` Քոռիի որդին Սափատ, 7Յուդայի ցեղէն` Յեփոնէի որդին Քաղէբ, 8Իսաքարի ցեղէն` Յովսէփի որդին Իգաղ, 9Եփրեմի ցեղէն` Նաւէի որդին Օսէս, 10Բենիամինի ցեղէն` Ռափուի որդին Փաղտի, 11Զաբուղոնի ցեղէն` Սուդիի որդին Գեդդիէլ, 12Յովսէփի ցեղէն` այսինքն Մանասէի ցեղէն` Սուսիի որդին Գադդի, 13Դանի ցեղէն` Գամաղիի որդին Ամիէլ, 14Ասերի ցեղէն` Միքայէլի որդին Սաթուր, 15Նեփթաղիմի ցեղէն` Վափսիի որդին Նաբի, 16Գադի ցեղէն` Մաքքիի որդին Գուէլ: 17Ասոնք են այն մարդոց անունները զորոնք Մովսէս ղրկեց երկիրը լրտեսելու. և Մովսէս Նաւէի որդւոյն Օսէսի անունը Յեսու դրաւ: 18Եւ Մովսէս ղրկեց զանոնք Քանանու երկիրը լրտեսելու, ու ըսաւ անոնց, Այս հարաւային կողմէն դէպ ի վեր երթալով, լեռը ելէք. 19Եւ այն երկրին ինչպէս ըլլալը ու հոն բնակող ժողովուրդին զօրաւոր կամ տկար, քիչուոր կամ շատուոր ըլլալը տեսէք. 20Եւ այն երկիրը ուր անոնք կը բնակին` ի°նչպէս է, աղէ՞կ է թէ գէշ. և ի°նչպէս են այն քաղաքները ուր անոնք կը բնակին, վրաններէ՞ բաղկացած են թէ պարսպաւոր են. 21Եւ երկիրը ի°նչպէս է, պարա՞րտ է թէ անբեր, մէջը ծառեր կա՞ն թէ ոչ: Եւ ժիր եղէք, ու այն երկրին պտուղէն առէք: Եւ այն օրերը խաղողին նոր ելած օրերն էին: 22Եւ ելան ու այն երկիրը լրտեսեցին Սին անապատէն մինչև դէպ ի Եմաթ երթալու Րոոբ: 23Եւ հարաւային կողմէն ելան, ու դէպ ի Քեբրոն եկան. ու հոն կը բնակէին Ենակի որդիները, Աքիման, Սէսի և Թոլմի. ու Քեբրոն Եգիպտոսի Տայանիս քաղաքէն եօթը տարի առաջ չինուած էր: 24Եւ մինչև Եսքողի ձորը եկան, ու անկէ խաղողի ողկոյզ մը կտրեցին ուռովը մէկտէղ, և երկու հոգի լծակով վերցուցին զանիկա. և նուռերէն ու թուզերէն ալ տարին: 25Իսրայէլի որդիներուն անկէ կտրած ողկոյզին համար այն տեղին անունը Եսքողի ձոր դրուեցաւ: 26Եւ քառասուն օրէն ետքը այն երկիրը լրտեսելէն դարձան. 27Եւ գալով հասան Մովսէսի ու Ահարոնի և Իսրայէլի որդիներուն բոլոր ժողովքին, Փառանի անապատը, Կադէս. և անոնց բոլոր ժողովքին լուր բերին. և երկրին պտուղը ցուցուցին անոնց: 28Եւ պատմեցին անոր ու ըսին, Մեզ ղրկած երկիրդ գացինք. իրաւցընէ կաթ ու մեղր կը բղխէ այն, և անոր պտուղը այս է: 29Բայց այն երկրին մէջ բնակող ժողովուրդը զօրաւոր է, և քաղաքները պարսպաւոր ու խիստ մեծ են. նաև հոն Ենակի որդիները տեսանք: 30Ամաղեկացիք այն երկրին հարաւային կողմը կը բնակին. ու Քետացիք և Յեբուսացիք ու Ամօրհացիք լեռները կը բնակին, և Քանանացիք ծովուն քով ու Յորդանանու եզերքը կը բնակին: 31Եւ Քաղէբ ժողովուրդը Մովսէսի առջև լռեցուց, ու ըսաւ, Աղէ, ելլենք, ու ժառանգենք զայն. քանզի մենք անշուշտ կարող ենք անոր տիրելու: 32Բայց անոր հետ ելլող մարդիկը ըսին, Մենք այն ժողովուրդին վրայ ելլելու կարող չենք, վասն զի անոնք մեզմէ զօրաւոր են: 33Եւ իրենց լրտեսած երկրին համար գէշ լուր բերին Իսրայէլի որդիներուն` ըսելով, Այն երկիրը, որուն մէջտեղէն անցանք զանիկա լրտեսելու համար, իր բնակիչները ուտող երկիր մըն է. և անոր մէջի բոլոր ժողովուրդը զոր մենք տեսանք, յաղթահասակ մարդիկ են: 34Եւ հոն տեսանք հսկաները, Ենակի որդիները, որ հսկաներէն են. այնպէս որ մենք մեր աչքին մարախի պէս երեւցանք, և այնպէս ալ անոնց աչքին երեւցանք: