Կադէսէն դէպքեր

1Եւ Իսրայէլի որդիներուն բոլոր ժողովքը Սին անապատը եկան առաջին ամսուն, ու ժողովուրդը Կադէսի մէջ իջեւան ըրաւ. և Մարիամ հոն վախճանեցաւ, ու հոն թաղուեցաւ: 2Եւ ժողովքին խմելու ջուր չկար. ու Մովսէսի և Ահարոնի վրայ հաւաքուեցան: 3Եւ ժողովուրդը Մովսէսի հէտ վիճելով խօսեցան ու ըսին, Երանի՜ թէ մենք ալ մեռնէինք երբ մեր եղբայրները մեռան Տէրոջը առջև: 4Եւ ինչո՞ւ Տէրոջը ժողովուրդը այս անապատը բերիք, որ մենք ու մեր անասունները հոս մեռնինք: 5Եւ ինչո՞ւ մեզ Եգիպտոսէ հանեցիք` մեզ այս գէշ տեղը բերելու համար. հոս ոչ սերմ ցանելու տեղ է, ոչ ալ թզենիներու ու այգիներու և նռնենիներու. խմելու ջուր անգամ չկայ: 6Եւ Մովսէս ու Ահարոն ժողովքին առջեւէն ելլելով ժողովքի խորանին դուռը գացին, ու իրենց երեսին վրայ ինկան. և Տէրոջը փառքը անոնց երեւցաւ: 7Եւ Տէրը խօսեցաւ Մովսէսի` ըսելով, 8Գաւազանը առ, ու ժողովքը ժողվէ դուն ու քու եղբայրդ Ահարոն, և անոնց աչքերուն առջև խօսեցէք ապառաժին, ու իր ջուրը պիտի տայ. և դուն ապառաժէն ջուր պիտի հանես անոնց, ու ժողովքին և անոնց անասուններուն խմցնես: 9Եւ Մովսէս առաւ գաւազանը Տէրոջը առջեւէն, ինչպէս իրեն պատուիրեց: 10Եւ Մովսէս ու Ահարոն ժողովքը ապառաժին առջև ժողվեցին. և ըսաւ անոնց, Լսեցէք հիմա, ով ապստամբներ, ձեզի այս ապառաժէ՞ն ջուր հանենք: 11Եւ Մովսէս իր ձեռքը վերցուց, ու գաւազանովը երկու անգամ ապառաժին զարկաւ. և առատօրէն ջուր ելաւ, և ժողովքը ու անոնց անասունները խմեցին: 12Եւ Տէրը խօսեցաւ Մովսէսի ու Ահարոնի, որովհետև ինծի չհաւատացիք Իսրայէլի որդիներուն աչքերուն առջև զիս փառաւորելու, անոր համար այս ժողովուրդը դուք պիտի չտանիք այն երկիրը զոր անոնց տուի: 13Մերիպայի ջուրը այս է. վասն զի Իսրայէլի որդիները Տէրոջը դէմ վիճեցան, և ինք փառաւորուեցաւ անոնց մէջ:

Եդովմի թագաւորը կ’արգիլէ Իսրայէլի անցքը

14Եւ Մովսէս Կադէսէ դեսպաններ ղրկեց Եդովմի թագաւորին ու ըսաւ, Այսպէս կ’ըսէ քու եղբայրդ Իսրայէլ, Մեզի պատահած բոլոր նեղութիւնը գիտես. 15Ի°նչպէս մեր հայրերը Եգիպտոս իջան, և բնակեցանք Եգիպտոսի մէջ շատ ատեն. և Եգիպտացիք չարչարեցին մեզ ու մեր հայրերը: 16Եւ երբ մենք Տէրոջը աղաղակեցինք, լսեց մեր ձայնը. և հրեշտակ մը ղրկեց, ու մեզ Եգիպտոսէ հանեց. և ահա մենք քու սահմանիդ ծայրի Կադէս քաղաքին մէջ ենք. 17Շնորհք ըրէ, անցնինք քու երկրէդ. արտերէն ու այգիներէն պիտի չանցնինք, և հորերէն ջուր պիտի չխմենք. արքունական ճամբայէն պիտի երթանք, աջ կամ ձախ կողմը պիտի չխոտորինք` մինչև որ քու սահմանէդ անցնինք: 18Եւ Եդովմ ըսաւ անոր, Իմ երկրէս* պիտի չանցնիս, ապա թէ ոչ` սրով քու դէմդ կ’ելլեմ: 19Եւ Իսրայէլի որդիները ըսին անոր, Մենք մեծ ճամբայէն կ’անցնինք, և եթէ ես ու իմ անասուններս քու ջուրէդ խմենք, անոր գինը կը հատուցանեմ. առանց ուրիշ բան մը ընելու իմ ոտքերովս կ’անցնիմ: 20Եւ անիկա ըսաւ, Պիտի չանցնիս. և Եդովմ մեծ բազմութիւնով ու հզօր ձեռքով անոնց դէմը ելաւ: 21Այսպէս Եդովմ իր սահմանէն Իսրայէլի ճամբայ տալ չուզեց. ուստի Իսրայէլ դարձաւ անկէ:

Ահարոնին մահը

22Եւ Կադէսէ չուեցին, ու իսրայէլի որդիներուն բոլոր ժողովքը Հովր լեռը եկան: 23Եւ Տէրը խօսեցաւ Մովսէսի ու Ահարոնի Հովր լեռը` Եդովմի երկրին սահմանին քով` ըսելով, 24Ահարոն իր ժողովուրդին պիտի խառնուի. քանզի Մերիպայի ջուրին քով իմ հրամանիս դէմ ապստամբութիւն ընելնուդ համար պիտի չմտնէ այն երկիրը զոր Իսրայէլի որդիներուն տուի: 25Ահարոնը ու անոր որդին Եղիազարը առ, ու Հովր լեռը հանէ զանոնք. 26Եւ Ահարոնը իր զգեստներէն մերկացուր, ու անոր որդւոյն Եղիազարի հագցուր զանոնք. վասն զի Ահարոն իր ժողովուրդին պիտի խառնուի, ու հոն մեռնի: 27Եւ Մովսէս Տէրոջը պատուիրածին պէս ըրաւ. ու բոլոր ժողովքին աչքին առջև Հովր լեռը ելան: 28Եւ Մովսէս մերկացուց Ահարոնը իր զգեստներէն, ու անոր որդւոյն Եղիազարի հագցուց զանոնք. և Ահարոն հոն լեռանը գլուխը մեռաւ. ու Մովսէս ու Եղիազար լեռնէն իջան: 29Եւ երբ բոլոր ժողովքը տեսան որ Ահարոն մեռաւ, Իսրայէլի բոլոր տունը Ահարոնի համար երեսուն օր լացին: