Մովաբի թագաւորը Բաղաամին դեսպան կը ղրկէ

1Եւ Իսրայէլի որդիները չուեցին, ու Մովաբի դաշտերուն մէջ Յորդանանու անդիի կողմը Երիքովի դիմաց իջեւան ըրին: 2Եւ Սեպփօրի որդին Բաղակ տեսաւ այն ամէնը զորոնք Իսրայէլ ըրաւ Ամօրհացւոց: 3Եւ Մովաբ խիստ վախցաւ ժողովուրդէն, վասն զի շատուոր էին. ու Մովաբ Իսրայէլի որդիներուն երեսէն տագնապի մէջ էր: 4Եւ Մովաբ Մադիամու ծերերուն ըսաւ, Հիմա այս ժողովուրդը պիտի լզեն մեր բոլորտիքը եղած ամէնը, ինչպէս արջառը դաշտին խոտը կը լզէ: Եւ Սեպփօրի որդին Բաղակ Մովաբի թագաւորն էր այն ատեն: 5Եւ Բէովրի որդւոյն Բաղաամի դեսպաններ ղրկեց Փաթուր քաղաքը, (որուն ժողովուրդին որդւոցը երկիրը, Գետին եզերքն էր*,) զանիկա կանչելու և ըսելու, Ահա Եգիպտոսէ ժողովուրդ մը ելաւ. ահա երկրին երեսը ծածկեց, և իմ դիմացս կը նստի. 6Ուստի հիմա կ’աղաչեմ, եկուր, ինծի համար անիծէ այս ժողովուրդը. քանզի անիկա ինծմէ զօրաւոր է. թերեւս կարող ըլլամ զանիկա զարնել, ու երկրէս վռնտէմ զանիկա. վասն զի գիտեմ որ քու օրհնածդ օրհնեալ է, և քու անիծածդ` անիծեալ: 7Եւ Մովաբի ծերերը ու Մադիամու ծերերը իրենց ձեռքերուն մէջ հմայութեան վարձքերով գացին, և Բաղաամի եկան ու Բաղակի խօսքերը ըսին անոր: 8Եւ անիկա ըսաւ անոնց, Այս գիշեր հոս մնացէք. և Տէրը ինչ որ ինծի խօսելու ըլլայ, անոր համեմատ պատասխան պիտի տամ ձեզի. ու Մովաբի իշխանները Բաղաամի քով մնացին: 9Եւ Աստուած Բաղաամի եկաւ ու ըսաւ, Ո՞վ են այդ քու քովդ եղած մարդիկը: 10Եւ Բաղաամ ըսաւ Աստուծոյ, Մովաբի թագաւորը Սեպփօրեան Բաղակ ասոնք ինծի ղրկեց` ըսելով, 11Ահա Եգիպտոսէ ելլող ժողովուրդը երկրին երեսը ծածկեց. հիմա եկուր, անիծէ զանիկա ինծի համար, որ թերեւս կարող ըլլամ անոր յաղթել ու զանիկա վռնտել: 12Եւ Աստուած ըսաւ Բաղաամի, Ատոնց հետ չերթաս, ժողովուրդը չանիծես. վասն զի անիկա օրհնեալ է: 13Եւ Բաղաամ առտուանց ելաւ, ու ըսաւ Բաղակի իշխաններուն, Դուք ձեր երկիրը գացէք. վասն զի Տէրը զիս չթողուր ձեզի հետ երթալ: 14Եւ Մովաբի իշխանները ելան, ու Բաղակի եկան և ըսին, Բաղաամ մեզի հետ գալ չուզեց: 15Եւ Բաղակ դարձեալ անոնցմէ աւելի շատ ու աւելի պատուաւոր իշխաններ ղրկեց: 16Եւ անոնք Բաղաամի եկան ու ըսին անոր, Սեպփօրի որդին Բաղակ այսպէս կ’ըսէ, Կ’աղաչեմ, ինծի գալէ մի հրաժարիր. 17Քանզի քեզի շատ պատիւ պիտի ընեմ, և ինծի ինչ որ ըսես` պիտի ընեմ, ուստի կ’աղաչեմ, եկուր, անիծէ այս ժողովուրդը ինծի համար: 18Եւ Բաղաամ պատասխան տուաւ ու ըսաւ Բաղակի ծառաներուն, Եթէ Բաղակ իր տունովը լեցուն արծաթ ու ոսկի տայ ինծի, իմ Տէր Աստուծոյս խօսքէն չեմ կրնար անցնիլ` պզտիկ կամ մեծ բան մը ընելու: 19Եւ հիմա կ’աղաչեմ, այս գիշեր դուք ալ հոս կեցէք, որպէս զի գիտնամ թէ Տէրը ուրիշ ի°նչ պիտի ըսէ ինծի: 20Եւ Աստուած գիշերը Բաղաամի եկաւ, ու ըսաւ անոր, Եթէ մարդիկը քեզ կանչելու գան, ելիր, անոնց հետ գնա. բայց ինչ որ քեզի խօսիմ, միայն զայն ընես:

Բաղաամին էշը կը խօսի

21Եւ Բաղաամ առտուանց ելաւ, ու իր իշուն համետը դրաւ, և Մովաբի իշխաններուն հետ գնաց: 22Ու երթալուն համար Աստուծոյ բարկութիւնը բորբոքեցաւ, ու Տէրոջը հրեշտակը ճամբուն վրայ կայնեցաւ իբրև անոր թշնամի մը. և անիկա իր իշուն վրայ հեծած էր, ու անոր երկու ծառաները իրեն հետ էին: 23Ու էշը տեսաւ Տէրոջը հրեշտակը, որ ճամբուն վրայ կայնած էր ու իր ձեռքը մերկ սուր մը ունէր, ու էշը ճամբայէն դարձաւ և արտը մտաւ. ու Բաղաամ էշը ծեծեց, որպէս զի ճամբան դարձնէ զանիկա: 24Եւ Տէրոջը հրեշտակը այգիներուն նեղ ճամբուն մէջ կայնեցաւ, ուր մէկ կողմէն պատ ու միւս կողմէն պատ կար: 25Եւ երբ էշը Տէրոջը հրեշտակը տեսաւ, պատին քով խոթուեցաւ, և Բաղաամի ոտքը պատին քով ճնշեց. ան ալ նորէն ծեծեց զանիկա: 26Եւ Տէրոջը հրեշտակը առաջ գնաց, ու նեղ տեղ մը կայնեցաւ, ուր աջ կամ ձախ կողմը խոտորելու ճամբայ չկար: 27Եւ երբ էշը Տէրոջը հրեշտակը տեսաւ, Բաղաամի տակ նստաւ. ու Բաղաամի բարկութիւնը բորբոքեցաւ, և գաւազանով ծեծեց էշը: 28Եւ Տէրը իշուն բերանը բացաւ, ու անիկա Բաղաամի ըսաւ, Ի՞նչ ըրի քեզի, որ այսպէս երեք անգամ զիս ծեծեցիր: 29Եւ Բաղաամ ըսաւ իշուն, Զիս ծաղր ընելուդ համար. երանի՜ թէ ձեռքս սուր մը ըլլար, որպէս զի հիմա քեզ մեռցնէի: 30Եւ էշը ըսաւ Բաղաամի, Ես այն քու էշդ չե՞մ, որուն վրայ կը հեծնէիր քու մանկութենէդ` մինչև այսօր. քեզի այսպէս ընել իմ սովորութի՞ւնս էր. ու անիկա ըսաւ, Ոչ: 31Այն ատեն Տէրը բացաւ Բաղաամի աչքերը. ու երբ տեսաւ որ Տէրոջը հրեշտակը ճամբուն վրայ կայնած էր, և իր ձեռքը մերկ սուր մը ուներ, իր երեսին վրայ ինկաւ ու երկրպագութիւն ըրաւ: 32Եւ Տէրոջը հրեշտակը ըսաւ անոր, Ինչո՞ւ այսպէս երեք անգամ քու էշդ ծեծեցիր. ահա ես քեզի թշնամութիւն ընելու ելայ. վասն զի քու ճամբադ ուղիղ չէ իմ առջեւս. 33Եւ էշը զիս տեսաւ, ու այս երեք անգամ է որ իմ առջեւէս մեկդի քաշուեցաւ. եթէ անիկա իմ առջեւէս մէկդի չքաշուէր, հիմա ես քեզ անշուշտ մեռցուցեր ու զանիկա ողջ թողուցեր էի: 34Եւ Բաղաամ ըսաւ Տէրոջը հրեշտակին, Մեղք գործեցի, չգիտնալով որ ճամբուն վրայ ինծի դէմ կայներ էիր. ուստի եթէ քեզի անհաճոյ կ’երեւնայ իմ երթալս, ետ դառնամ: 35Եւ Տէրոջը հրեշտակը ըսաւ Բաղաամի, Գնա այդ մարդոց հետ, բայց այն խօսքը զոր քեզի պիտի զրուցեմ, զայն միայն խօսիս. և Բաղաամ գնաց Բաղակի իշխաններուն հետ:

Բաղակ Բաղաամը կ’ընդունի

36Եւ Բաղակ երբ լսեց որ Բաղաամ կու գայ, զանիկա դիմաւորելու ելաւ իր սահմանը եղող Առնոն գետին քովի Մովաբացւոց մէկ քաղաքը, որ սահմանին ծայրն է: 37Եւ Բաղակ ըսաւ Բաղաամի, Քեզ կանչելու յատկապէս չղրկեցի՞. ինչո՞ւ չեկար ինծի. արդեօք քեզի պատիւ ընելու կարողութիւն չունի՞մ: 38Եւ Բաղաամ ըսաւ Բաղակի, Ահա ես քեզի եկայ. բայց ես բնաւ զօրութիւն ունի՞մ բան մը ըսելու, Աստուած իմ բերանս ինչ խօսք որ դնէ, զայն պիտի խօսիմ: 39Եւ Բաղաամ Բաղակի հետ գնաց, ու Կարիաթ-հուսովթ եկան: 40Եւ Բաղակ արջառներ ու ոչխարներ մորթեց, ու Բաղաամի և անոր հետ եղող իշխաններուն ղրկեց: 41Ու երբ առտու եղաւ, Բաղակ առաւ Բաղաամը, և Բահաղի բարձր տեղերը հանեց զանիկա. ու անկէ ժողովուրդին ծայրը տեսաւ: