1Պօղոս, Յիսուս Քրիստոսի կապեալը, և Տիմոթէոս եղբայրը, Փիլիմոնի, մեր սիրելիին ու գործակցին, 2Եւ Ապփիա սիրելիին, ու Արքիպպոս մեր զինուորակցին, ու քու տանդ մէջի եկեղեցիին. 3Շնորհք և խաղաղութիւն ձեզի Աստուծմէ մեր Հօրմէն և Տէր Յիսուս Քրիստոսէ:

Փիլիմոնին սէրն ու հաւատքը

4Կը գոհանամ միշտ իմ Աստուծմէս` քեզ իմ աղօթքներուս մէջ յիշելով, 5Երբ կը լսեմ քու սէրդ ու հաւատքդ` զոր ունիս Տէր Յիսուսի վրայ և բոլոր սուրբերուն վրայ, 6Որպէս զի քու հաւատքիդ հաղորդակցութիւնը պտղաբեր ըլլայ` Քրիստոս Յիսուսով ձեր վրայ եղած ամէն բարութեանը ճանչցուելովը: 7Քանզի շատ ուրախութիւն և մխիթարութիւն ունինք քու սիրոյդ վրայ, որ սուրբերուն սիրտերը քեզմով հանգստացած են, եղբայր:

Խնդրանք Ոնեսիմոսին համար

8Ասոր համար թէև շատ համարձակութիւն ունիմ Քրիստոսով` վայելուչ եղածը քեզի հրամայելու, 9Բայց յաւէտ սիրոյ համար կ’աղաչեմ, այնպիսի մէկը ըլլալով` ինչպէս եմ ես Պօղոս ծերացած, ու հիմա Յիսուս Քրիստոսի համար կապուած ալ: 10Կ’աղաչեմ քեզի իմ որդւոյս Ոնեսիմոսի համար, զոր իմ կապանքներուս մէջ ծնայ, 11Որ ատեն մը անպիտան էր քեզի, բայց հիմա քեզի ալ ինծի ալ պիտանի է. 12Զանիկա ետ ղրկեցի. դուն ալ ընդունէ զանիկա որ է իմ աղիքս. 13Զոր կ’ուզէի իմ քովս պահել, որպէս զի քու տեղդ ինծի սպասաւորութիւն ընէ աւետարանին կապանքներուն մէջ: 14Բայց առանց քու կամքիդ չուզեցի բան մը ընել, որպէս զի քու բարերարութիւնդ իբր թէ ստիպմամբ եղած չըլլայ, հապա կամաւ: 15Քանզի թերևս այս պատճառաւ անիկա քիչ մը ատեն զատուեցաւ, որպէս զի զանիկա յաւիտեան ունենաս, 16Ոչ թէ ալ ծառայի մը պէս, հապա ծարայէ վեր, սիրելի եղբօր պէս. և եթէ ինծի այսպէս սիրելի է, ո՜րչափ աւելի պիտի ըլլայ քեզի` թէ° մարմինի կողմանէ ու թէ° Տէրոջը: 17Ուստի եթէ զիս քեզի հաղորդ կը սեպես, ընդունէ զանիկա` որպէս թէ զիս: 18Եւ եթէ քեզի անիրաւութիւն մը ըրած է կամ պարտք մը ունի, զայն իմ հաշիւիս անցուր: 19Ես Պօղոս իմ ձեռքովս գրեցի, ես կը վճարեմ. որ չըսեմ քեզի թէ դուն ալ քու անձդ ինծի պարտական ես: 20Այո, եղբայր, թող քեզմէ ունենամ այս օգուտը Տէրոջմով. հանգչեցուր իմ աղիքս Տէրոջմով: 21Քու հնազանդութեանդ վստահանալով քեզի գրեցի, քանզի գիտեմ որ ըսածէս ալ աւելի պիտի ընես:

Վերջին բարևներ

22Ասկէ զատ ինծի բնակարան մըն ալ պատրաստէ, վասն զի կը յուսամ թէ ձեր աղօթքներուն միջոցաւ ձեզի պիտի շնորհուիմ: 23Բարև կ’ընէ քեզի Եպափրաս, իմ գերութեան ընկերս Քրիստոս Յիսուսով. 24Նաև Մարկոս, Արիոտարքոս, Դեմաս, Ղուկաս, իմ գործակիցներս: 25Մեր Տէր Յիսուս Քրիստոսի շնորհքը ձեր հոգիին հետ ըլլայ: Ամէն: