Քրիստոսին խոնարհութիւնը և մեծութիւնը

1Ուստի եթէ Քրիստոսով մխիթարութիւն մը կայ, եթէ սիրոյ սփոփանք մը, եթէ Հոգիի հաղորդութիւն մը, եթէ գթութիւն ու ողորմութիւն մը, 2Իմ ուրախութիւնս դուք լեցուցէք, նոյն խորհուրդը ունեցէք, միևնոյն սէրը ձեր մէջ ունենալով, մէկ շունչ, մէկ մտածմունք: 3Բան մը գրգռութիւնով կամ սնապարծութիւնով մի ընէք. հապա խոնարհութիւնով մէկզմէկ ձեր անձէն լաւ սեպեցէք. 4Միայն անձերնուդ շահը մի նայիք. հապա ամէն մէկը իր ընկերինն ալ: 5Ձեզմէ ամէն մէկը նոյն միտքը թող ունենայ, որ Քրիստոս Յիսուսի մէջ էր. 6Որ Աստուծոյ կերպարանքը ունենալով, յափշտակութիւն մը չսեպեց Աստուծոյ հաւասար ըլլալը. 7Հապա անձը ունայնացուց ծառայի կերպարանք առնելով` մարդոց նման ըլլալով. և կերպարանքովը մարդու պէս գտնուելով, 8Ինքզինք խոնարհեցուց, մինչև մահուան հնազանդ եղաւ, ու այն ալ խաչին մահուանը: 9Ասոր համար Աստուած ալ զանիկա խիստ բարձրացուց, ու անոր անուն մը տուաւ` որ ամէն անունէ վեր է. 10Որպէս զի Յիսուսի անունին ամէն ծունկ ծռի, երկնաւորներուն, երկրաւորներուն և սանդարամետա- կաններուն, 11Եւ ամէն լեզու դաւանի թէ Յիսուս Քրիստոս Տէր է Հօր Աստուծոյ փառքին համար:

Լոյսի պէս փայլիլ աշխարհի մէջ

12Ուստի, իմ սիրելիներս, ինչպէս ամէն ատեն հնազանդ եղաք` ոչ միայն իմ ներկայութեանս, հապա ա°լ աւելի հիմա, իմ բացակայութեանս ատեն, ահով ու դողով անձերնուդ փրկութիւնը գործեցէք. 13Վասն զի Աստուած է որ ձեր մէջ կը ներգործէ կամենալը ու ընելը իր հաճութեանը համար: 14Ամէն բան առանց տրտունջներու ու վիճաբանութիւններու ըրէք. 15Որպէս զի ըլլաք անբիծ ու անարատ, Աստուծոյ որդիներ առանց մեղադրանքի, կամակոր ու խոտորեալ ազգին մէջ, որոնց մէջ դուք լուսաւորներու պէս կը փայլիք աշխարհի մէջ, 16Կենաց խօսքը ամուր բռնելով` ինծի պանծանք ըլլալու համար Քրիստոսի օրը, թէ պարապ տեղ չքալեցի, և պարապ տեղ չաշխատեցայ: 17Բայց թէպէտև ձեր հաւատքին պատարագին ու պաշտօնին վրայ ընծայուիմ, կ’ուրախանամ և ձեր ամէնուն ուրախակից կ’ըլլամ. 18Նոյնպէս ալ դուք ուրախացէք ու ինծի ուրախակից եղէք:

Տիմոթէոս և Եպափրոդիտոս

19Արդ կը յուսամ Տէր Յիսուսով որ Տիմոթէոսը շուտով ձեզի ղրկեմ, որպէս զի իմ սիրտս ալ հանգչի, երբ ձեր վիճակը գիտնամ: 20Վասն զի անոր նման սրտակից մէկը չունիմ, որ մտերմաբար ձեզի համար հոգ տանի: 21Քանզի ամէնը իրենցը կը փնտռեն` ու ոչ թէ Յիսուս Քրիստոսին: 22Բայց դուք անոր փորձը գիտէք, որ ինչպէս որդի մը հօրը հետ` այնպէս ինծի հետ ծառայութիւն ըրաւ աւետարանին մէջ: 23Ուստի կը յուսամ զանիկա ղրկել շուտ մը` իմ ինչպէս ըլլալիքս ստուգածիս պէս: 24Բայց վստահութիւն ունիմ Տէրոջմով` որ ես ալ քիչ ատենէն պիտի գամ: 25Միայն թէ հարկաւոր սեպեցի հիմա ձեզի ղրկել Եպափրոդիտոս իմ եղբայրս և գործակիցս ու զինուորակիցս, ձեր ղրկածը ու իմ պիտոյքիս ծառայողը: 26Որովհետև ինք ալ շատ փափաք ունէր ձեզ ամէնդ ալ (տեսնելու).ու կը տրտմէր, որ դուք լսած էիք թէ ինք հիւանդացաւ: 27Եւ արդարև ինք հիւանդացաւ մահուան մօտ, բայց Աստուած ողորմեցաւ անոր. ոչ թէ միայն անոր` հապա ինծի ալ, որպէս զի տրտմութեան վրայ տրտմութիւն չունենամ: 28Ասոր համար աւելի փութով ղրկեցի, որպէս զի դուք զանիկա տեսնելով նորէն ուրախ ըլլաք, ու ես առանց տրտմութեան ըլլամ: 29Ուրեմն ընդունեցէք զանիկա Տէրոջմով ամէն ուրախութեամբ, ու այնպիսիները պատուականներու կարգը բռնեցէք. 30Քանզի Քրիստոսի գործին համար մինչև մահուան մօտեցաւ` իր կեանքը վտանգի մէջ ձգելով, որպէս զի ձեր ինծի ծառայելու պակասութիւնը ինք լեցնէ: