Ճշմարիտ արդարութիւնը

1Ուստի, իմ եղբայրներս, ուրախ եղէք Տէրոջմով. նոյն բաները ձեզի գրել ինծի ձանձրութիւն չէ, ու ձեզի ապահովութիւն է: 2Զգուշացէք շուներէն, զգուշացէք չար մշակներէն, զգուշացէք կրճատութենէն, 3Վասն զի թլփատութիւնը մենք ենք, որ հոգիով զԱստուած կը պաշտենք, ու կը պարծենանք Քրիստոս Յիսուսով, և մարմինի վրայ չէ վստահութիւննիս: 4Թէպէտ ես ալ նոյն վստահութիւնը ունիմ մարմինի վրայ. եթէ ուրիշ մէկը կը կարծէ թէ վստահութիւն ունի մարմինի վրայ, ալ աւելի ես. 5Ութ օրուան թլփատուած, Իսրայէլի ազգէն, Բենիամինի ցեղէն, Եբրայեցի` Եբրայեցիներէ, օրէնքին նայե-լով փարիսեցի. 6Նախանձաւոր ըլլալու կողմանէ` եկեղեցին կը հալածէի. օրէնքին արդարութեանը կողմանէ անարատ էի: 7Բայց ինչ որ ինծի շահ էր, զանիկա Քրիստոսի համար վնաս սեպեցի: 8Եւ իրաւ բոլոր բաներն ալ վնաս կը սեպեմ իմ Տէրոջս Քրիստոս Յիսուսի գերազանց գիտութեանը համար. որու համար ամէն բանէն զրկուեցայ, և աղտեղութիւն կը սեպեմ, որպէս զի Քրիստոսը շահիմ, 9Ու իր մէջ գտնուիմ, ոչ թէ իմ արդարութիւնս ունենամ որ օրէնքէն է, հապա Քրիստոսի հաւատքովը եղած արդարութիւնը` որ Աստուծմէ է հաւատքով. 10Ճանչնալու զանիկա և անոր յարութեանը զօրութիւնը ու անոր չարչարանքներուն հաղորդ ըլլալը, անոր մահուան կերպարանքը առնելով. 11Որ ըլլայ թէ մեռելներուն յարութեանը հասնիմ:

Վազէ դէպ ի նպատակակէտ

12Ոչ թէ ես արդէն առեր եմ, կամ արդէն կատարեալ եղեր եմ, հապա ետևէ ինկած եմ որ բռնեմ մրցանակը, որու համար ալ բռնուեցայ Քրիստոս Յիսուսէ: 13Եղբայրներ, ես չեմ սեպեր որ բռներ եմ. բայց բան մը կայ, որ ետևի եղածները մոռցած եմ, ու առջևի եղածներուն կը դիմեմ. 14Նպատակը դիտելով` Քրիստոս Յիսուսով եղած Աստուծոյ վերին կոչումին մրցանակին կը վազեմ: 15Ուստի մենք ամէնս որ կատարեալ ենք` ասիկա խորհինք, և եթէ բան մը ուրիշ կերպով խորհելու ըլլաք, զանիկա ալ ձեզի պիտի յայտնէ Աստուած: 16Միայն թէ ինչ աստիճանի որ հասեր ենք, նոյն կանոնին համեմատ քալենք, նոյն խորհուրդը ունենանք: 17Ինծի նմանող եղէք, եղբայրներ, ու նայեցէք անոնց որ այնպէս կը քալեն, ինչպէս մեզ ձեզի օրինակ ունիք: 18Վասն զի շատերը կը քալեն, որոնց համար շատ անգամ ձեզի կ’ըսէի, և հիմա լալով ալ կը զրուցեմ, այսինքն Քրիստոսի խաչին թշնամիներուն համար. 19Որոնց վերջը կորուստ է, որոնց աստուածը իրենց որովայնն է, ու անոնց փառքը իրենց ամօթն է, որոնք միայն երկրաւոր բաները կը մտածեն: 20Բայց մեր քաղաքականութիւնը երկինքն է, ուրկէ ալ Փրկչին կը սպասենք, Տէր Յիսուս Քրիստոսի. 21Որ պիտի նորոգէ մեր խոնարհ մարմինը` իր փառաւոր մարմինին կերպարանակից ըլլալու, այն զօրութիւնովը որ կարող է ամէնը իրեն տակ հնազանդեցնելու: