Յորդորանքներ

1Ուստի, իմ սիրելի ու բաղձալի եղբայրներս, իմ ուրախութիւնս ու պսակս, այսպէս հաստատուն կեցէք Տէրոջմով, սիրելիներս: 2Եւոդիայի կ’աղաչեմ ու Սիւնտիքի կ’աղաչեմ, որ միևնոյն խորհուրդը ունենան Տէրոջմով: 3Իրաւ քեզի ալ կ’աղաչեմ, իմ հարազատ լծակիցս, դուն ալ օգնական եղիր անոնց, որոնք ինծի հետ աշխատեցան աւետարանին մէջ Կղեմէսի և իմ ուրիշ գործակիցներուս հետ, որոնց անունները կենաց գիրքին մէջ են. 4Ուրախ եղէք Տէրոջմով ամէն ատեն. դարձեալ կ’ըսեմ, ուրախ եղէք: 5Ձեր քաղցրութիւնը ամէն մարդոց թող յայտնի ըլլայ. Տէրը մօտ է: 6Բանի մը համար հոգ մի ընէք. հապա ամէն բանի մէջ աղօթքով ու աղաչանքով, գոհութիւնով մէկտեղ, ձեր խընդրուածքը Աստուծոյ յայտնի ըլլայ: 7Եւ Աստուծոյ խաղաղութիւնը, որ ամէն միտքէ վեր է, ձեր սիրտերը ու միտքերը Քրիստոս Յիսուսով պիտի պահպանէ: 8Վերջապէս, եղբայրներ, ինչ որ ճշմարտութիւնով է, ինչ որ պարկեշտութիւնով, ինչ որ արդարութիւնով, ինչ որ մաքրութիւնով, ինչ որ սիրով, ինչ որ բարի համբաւով, ինչ առաքինութիւն և ինչ գովութիւն որ կայ, այն բաները խորհեցէք: 9Ինչ որ սորվեցաք ու առիք և լսեցիք ու տեսաք իմ վրաս, զայն ըրէք. և խաղաղութեան Աստուածը ձեզի հետ պիտի ըլլայ:

Շնորհակալութիւն ընծաներուն համար

10Մեծապէս ուրախացայ Տէրոջմով, որ իմ վրաս ունեցած հոգերնիդ հիմա նորոգուեցաւ, ինչպէս կը հոգայիք ալ, միայն թէ պատեհութիւն չունէիք: 11Ոչ թէ կարօտութեան համար կ’ըսեմ, վասն զի ես սորվեցայ գոհ ըլլալ իմ գտնուած վիճակիս մէջ: 12Գիտեմ չքաւորութիւն քաշելը, գիտեմ շատը ունենալը. ամէն բանի մէջ ամէն կերպով աղէկ սորվեր եմ թէ° կշտանալը, թէ° անօթենալը, թէ° շատ ունենալը և թէ° պակսութիւն քաշելը: 13Ամէն բանի կարող եմ անով` որ զիս զօրացուց: 14Բայց աղէկ ըրիք որ իմ նեղութեանս մէջ ինծի հաղորդ եղաք: 15Դուք ալ գիտէք, Փիլիպպեցիներ, որ աւետարանին սկիզբը երբ ես Մակեդոնիայէ ելայ, եկեղեցի մըն ալ ինծի հետ հաղորդութիւն չըրաւ տալու և առնելու կողմէ, հապա միայն դուք. 16Որ Թեսաղոնիկէի մէջ ալ մէկ երկու անգամ ինծի պէտք եղածը ղրկեցիք: 17Ոչ թէ ես տուրք կը փնտռեմ, հապա պտուղ կը փնտռեմ` որ ձեր հաշիւին վրայ աւելնայ: 18Բայց ես ամէն բան առած եմ ու առատօրէն ունիմ. լցուած եմ` Եպափրոդիտոսի ձեռքով ձեր ղրկածները ընդունելով, որ անոյշ հոտ մըն է, ընդունելի պատարագ, Աստուծոյ հաճելի: 19Եւ իմ Աստուածս ձեր ամէն պիտոյքը պիտի լեցնէ իր ճոխութեանը չափովը փառքով` Քրիստոս Յիսուսի ձեռքով: 20Արդ Աստուծոյ ու մեր Հօրը փառք յաւիտեանս յաւիտենից: Ամէն:

Վերջին բարևներ

21Բարև ըրէք բոլոր սուրբերուն Քրիստոս Յիսուսով: 22Ձեզի բարև կ’ընեն ինծի հետ եղող եղբայրները: 23Ձեզի բարև կ’ընեն բոլոր սուրբերը, մանաւանդ անոնք որ Կայսրին տունէն են: 24Տէր Յիսուս Քրիստոսի շնորհքը ձեր ամէնուն հետ ըլլայ: Ամէն: