Մահուանէ ազատուածը Տէրը կը գովէ

1Ուրախ եմ ես*, վասն զի Տէրը Իմ ձայնս ու աղաչանքս լսեց. 2Վասն զի անիկա իր ականջը ինծի խոնարհեցուց, Ու իմ օրերուս մէջ անոր պիտի կանչեմ: 3Մահուան լարերը զիս պատեցին, Ու գերեզմանին վիշտերը զիս գտան. Նեղութիւն ու տրտմութիւն գտայ: 4Բայց ես Տէրոջը անունը կանչեցի, Կ’աղաչեմ, ով Տէր, փրկէ իմ անձս: 5Ողորմած ու արդար է Տէրը, Եւ մեր Աստուածը գթած է: 6Տէրը միամիտները կը պահէ. Ես խեղճ եղայ, ու անիկա զիս ազատեց: 7Ով իմ անձս, դարձիր քու հանգստութեանդ, Քանզի Տէրը քեզի բարիք ըրաւ: 8Վասն զի դուն իմ անձս մահուանէ փրկեցիր, Իմ աչքերս արցունքէն, ու իմ ոտքերս գայթակղելէն: 9Տէրոջը առջև պիտի քալեմ Կենդանիներուն երկրին մէջ: 10Հաւատացի, անոր համար խօսեցայ. Ես խիստ թշուառացայ: 11Իմ շփոթութեանս մէջ ըսի թէ Ամէն մարդ սուտ է: 12Ի՞նչ հատուցանեմ Տէրոջը` Անոր բոլոր ինծի ըրած բարութեանը փոխարէն: 13Փրկութեան բաժակը պիտի առնեմ, Ու Տէրոջը անունը պիտի կանչեմ: 14Իմ ուխտերս Տէրոջը պիտի հատուցանեմ Իր բոլոր ժողովուրդին առջև: 15Պատուական է Տէրոջը առջև Իր սուրբերուն մահը: 16Կաղաչեմ, ով Տէր, վասն զի ես քու ծառադ եմ, Ես քու ծառադ եմ ու քու աղախինիդ որդին. Դուն իմ կապերս արձակեցիր: 17Գոհութեան պատարագ պիտի մատուցանեմ քեզի, Ու Տէրոջը անունը պիտի կանչեմ: 18Իմ ուխտերս Տէրոջը պիտի հատուցանեմ Իր բոլոր ժողովուրդին առջև, 19Տէրոջը տանը սրահներուն մէջ, Քու մէջդ, ով Երուսաղէմ: Ալէլուիա: