Տիեզերական կոչ մը Աստուած փառաւորելու

1Ալէլուիա: Օրհնեցէք Տէրը երկինքէն. Օրհնեցէք զանիկա բարձր տեղերուն մէջ: 2Օրհնեցէք զանիկա, ով անոր բոլոր հրեշտակները. Օրհնեցէք զանիկա, ով անոր բոլոր զորքերը: 3Օրհնեցէք զանիկա, ով արեգակ ու լուսին. Օրհնեցէք զանիկա, ով բոլոր փայլուն աստղեր: 4Օրհնեցէք զանիկա, ով երկնից երկինք Ու երկինքէ վեր եղող ջուրեր: 5Թող Տէրոջը անունը օրհնեն. Վասն զի ինք հրամայեց, ու անոնք ստեղծուեցան: 6Եւ զանոնք յաւիտեանս յաւիտենից հաստատեց. Կանոն դրաւ որ չխափանուիր: 7Օրհնեցէք Տէրը երկրէ, Ով վիշապներ ու բոլոր անդունդներ. 8Կրակ և կարկուտ, ձիւն ու շոգի, Եւ անոր խօսքը կատարող մրրկալից հով, 9Լեռներ ու բոլոր բլուրներ, Պտղատու ծառեր ու եղևիններ, 10Գազաններ ու բոլոր անասուններ, Սողացողներ ու թևաւոր թռչուններ, 11Երկրի թագաւորներ և բոլոր ազգեր, Իշխաններ ու երկրի բոլոր դատաւորներ, 12Երիտասարդներ և կոյս աղջիկներ, Ծերեր ու տղաքներ. 13Թող Տէրոջը անունը օրհնեն, Վասն զի միայն անոր անունը բարձր է, Անոր փառքը երկրէ ու երկինքէ վեր է: 14Անիկա բարձրացուց իր ժողովուրդին եղջիւրը, Իր բոլոր սուրբերուն, Իրեն մօտ եղող ժողովուրդին, Իսրայէլի որդիներուն օրհնութիւնը: Ալէլուիա: