Աստուած է դատաւորը

Գլխաւոր երաժշտին. Ալ-թաշհէթ, Ասափի Սաղմոսը ու երգը

1Կը գովենք քեզ, ով Աստուած, Կը գովենք, և քու անունդ մօտ է. Քու հրաշքներդ կը պատմուին: 2Երբ որոշեալ ժամանակ ունենամ` Ուղիղ դատաստան պիտի տեսնեմ: 3Երկիր ու անոր բոլոր բնակիչները մաշեցան. Անոր սիւները ես կը հաստատեմ: (Սէլա:) 4Ըսի հպարտներուն թէ Հպարտութիւն մի ընէք. Ու ամբարիշտներուն` թէ Եղջիւր մի վերցնէք: 5Ձեր եղջիւրները վեր մի վերցնէք. Ամբարտաւան պարանոցով մի խօսիք: 6Վասն զի բարձրանալը ոչ արևելքէն է Եւ ոչ արևմուտքէն, ոչ ալ անապատէն, 7Հապա դատաւորը Աստուած է. Մէկը կը ցածցնէ, ու միւսը կը բարձրացնէ: 8Վասն զի Տէրոջը ձեռքը բաժակ կայ, ու գինին կարմիր է. Անիկա խառնուածքով լեցուն է, ու անկէ կը թափէ. Եւ իրաւ երկրի բոլոր ամբարիշտները Անոր մրուրները քամելով պիտի խմեն: 9Բայց ես յաւիտեան պիտի պատմեմ Յակոբի Աստուծոյն սաղմոս պիտի երգեմ: 10Ու ամբարիշտներուն բոլոր եղջիւրները պիտի փշրեմ, Արդարին եղջիւրները պիտի բարձրանան: