Հրեշտակը և կնքուած գրքոյկը

1Եւ տեսայ ուրիշ զօրաւոր հրեշտակ մը որ երկինքէն կ’իջնէր, ու ամպ հագած էր և իր գլխուն վրայ ծիածան կար. ու իր երեսը արևի պէս էր, և իր ոտքերը` կրակի սիւներու պէս. 2Եւ իր ձեռքը գրքոյկ մը ունէր բացուած, ու իր աջ ոտքը ծովուն վրայ դրաւ, և ձախը` ցամաքին վրայ. 3Եւ մեծ ձայնով աղաղակեց առիւծի մը գոչելուն պէս. ու երբ աղաղակեց, եօթը որոտումները իրենց ձայներովը խօսեցան: 4Ու երբ եօթը որոտումները խօսեցան, պիտի գրէի. ու երկինքէն ձայն մը լսեցի որ կ’ըսէր, Կնքէ այն բաները զորոնք եօթը որոտումները խօսեցան, ու զանոնք մի գրեր: 5Եւ այն հրեշտակը զոր ծովուն վրայ ու ցամաքին վրայ կայնած տեսայ, իր [աջ] ձեռքը երկինք վերցուց. 6Ու երդում ըրաւ յաւիտեանս յաւիտենից Կենդանի եղողին վրայ, որ ստեղծեց երկինքը ու ինչ որ անոր մէջ է, ու երկիրը և ինչ որ անոր մէջ է, և ծովը ու ինչ որ անոր մէջ է, թէ ա՛լ ժամանակ պիտի չըլլայ. 7Հապա եօթներորդ հրեշտակին ձայնին օրերը` երբ փողը հնչեցնէ, Աստուծոյ խորհուրդը պիտի կատարուի, ինչպէս իր ծառաներուն, մարգարէներուն, աւետիս տուաւ: 8Եւ այն ձայնը զոր երկինքէն լսեցի, նորէն խօսեցաւ ինծի ու ըսաւ, Գնա առ այն բաց գրքոյկը` որ ծովուն ու ցամաքին վրայ կայնող հրեշտակին ձեռքն է: 9Ես ալ հրեշտակին գացի ու ըսի անոր, Տուր ինծի այդ գրքոյկը. ու ըսաւ ինծի, Առ ասիկա ու կեր. և քու փորիդ մէջ դառնութիւն պիտի պատճառէ, բայց բերնիդ մէջ մեղրի պէս անոյշ պիտի ըլլայ: 10Եւ գրքոյկը հրեշտակին ձեռքէն առի ու կերայ զանիկա. և իմ բերնիս մէջ մեղրի պէս անոյշ էր, և ուտելէս ետքը փորիս մէջ դառնութիւն եղաւ: 11Ու ըսաւ ինծի, Պէտք է որ դուն նորէն մարգարէութիւն ընես շատ ժողովուրդներու և ազգերու ու լեզուներու և թագաւորներու վրայով: