Կինը և վիշապը

1Ու երկինքի մէջ մեծ նշան մը երևցաւ. կին մը արևը իր վրայ առած, ու լուսինը իր ոտքերուն տակ. և իր գլխուն վրայ տասուերկու աստղէ պսակ մը. 2Եւ յղի էր, ու երկունքի մէջ ըլլալով և ծնանելու համար շատ նեղութիւն քաշելով` կը պոռար: 3Ու երկինքի մէջ ուրիշ նշան մը երևցաւ, և ահա մեծ շառագոյն վիշապ մը, որ եօթը գլուխ ու տասը եղջիւր ունէր, և իր գլուխներուն վրայ եօթ թագ: 4Եւ անոր պոչը երկինքի աստղերուն երրորդ մասը կը քաշէր, ու զանոնք երկրի վրայ ձգեց. և վիշապը կեցեր էր այն կնոջ առջև որ ծնանելու վրայ էր, որպէս զի երբ ծնանի, անոր զաւակը կլլէ: 5Ու կինը արու զաւակ մը ծնաւ, որ երկաթէ գաւազանով պիտի հովուէր բոլոր ազգերը. և անոր զաւակը յափշտակուեցաւ Աստուծոյ քով ու անոր աթոռին քով: 6Եւ կինը անապատը փախաւ, ուր անոր տեղ պատրաստուած էր Աստուծմէ, որպէս զի հոն կերակրուի հազար երկու հարիւր ու վաթսուն օր: 7Ու երկինքի մէջ պատերազմ եղաւ. Միքայէլ ու իր հրեշտակները վիշապին հետ պատերազմեցան. վիշապն ալ իր հրեշտակներովը պատերազմեցաւ. 8Ու չկրցան դէմ կենալ, ու երկինքի մէջ ա°լ տեղ չգտնուեցաւ անոնց: 9Եւ վար ձգուեցաւ մեծ վիշապը, այն առաջուան օձը որ բանսարկու ու սատանայ կ’ըսուի, որ բոլոր աշխարհ մոլորեցուց. ու իր հրեշտակները իրեն հետ վար ձգուեցան երկրի վրայ: 10Եւ մեծ ձայն մը լսեցի երկինքի մէջ` որ կ’ըսէր, Հիմա եղաւ մեր Աստուծոյ փրկութիւնը ու զօրութիւնը և թագաւորութիւնը, ու անոր Օծեալին իշխանութիւնը. վասն զի մեր եղբայրներուն դէմ չար խօսողը վար ձգուեցաւ, որ անոնց դէմ չարախօսութիւն կ’ընէր մեր Աստուծոյն առջև ցորեկ ու գիշեր: 11Եւ անոնք անոր յաղթեցին Գառնուկին արիւնովը, ու իրենց վկայութեանը խօսքովը. և իրենց կեանքը չսիրեցին մինչև ի մահ: 12Ասոր համար ուրախացէք, ով երկինք ու անոր մէջ բնակողներ. վա՜յ երկրի ու ծովու, վասն զի Բանսարկուն ձեզի իջաւ, որ շատ բարկութիւն ունի` գիտնալով որ քիչ ժամանակ պիտի կենայ: 13Ու երբ վիշապը տեսաւ որ ինք երկրի վրայ ձգուեցաւ, արու զաւակ ծնանող կնոջ ետևէն ինկաւ: 14Եւ այն կնոջ մեծ արծիւի երկու թեւեր տրուեցաւ, որպէս զի անապատ իր տեղը թռչի, ուր պիտի կերակըրուէր ժամանակ ու ժամանակներ ու կէս ժամանակ` օձին երեսէն: 15Եւ օձը իր բերնէն գետի պէս ջուր վազցուց կնոջ ետևէն, որպէս զի զանիկա հեղեղով ընկըղմէ: 16Ու երկիր օգնեց կնոջը ու երկիր իր բերանը բացաւ և կլլեց այն գետը զոր վիշապը իր բերնէն վազցուց: 17Ու վիշապը բարկացաւ կնոջ դէմ, և գնաց պատերազմելու անոր ուրիշ զաւակներուն հետ, որոնք Աստուծոյ պատուիրանքները կը պահէին, ու Յիսուսի վկայութիւնը ունէին: 18Եւ կայնեցայ ծովուն աւազին վրայ: