Աստուծոյ բարկութեան սկաւառակները

1Եւ տաճարէն մեծ ձայն մը լսեցի` որ եօթը հրեշտակներուն կ’ըսէր, Գացէք Աստուծոյ բարկութեան [եօթը] սկաւառակները երկրի վրայ թափեցէք: 2Եւ առաջին հրեշտակը գնաց ու իր սկաւառակը երկրի վրայ թափեց. ու չարաչար պալարներ եղան այն մարդոց վրայ որոնք գազանին դրոշմը ունէին ու անոր պատկերին երկրպագութիւն կ’ընէին: 3Ու երկրորդ հրեշտակը իր սկաւառակը ծովուն վրայ թափեց, ու ջուրերը մեռած մարդու արիւն դարձան, և ծովուն մէջի բոլոր կենդանիները մեռան: 4Ու երրորդ հրեշտակը իր սկաւառակը գետերուն ու ջուրերու աղբիւրներուն վրայ թափեց, ու անոնք արիւն դարձան: 5Եւ ջուրերուն հրեշտակէն լսեցի` որ կ’ըսէր, Արդար ես դուն, որ ես և որ էիր, և սուրբ ես, որ այսպիսի դատաստաններ ըրիր. 6Վասն զի անոնք սուրբերուն ու մարգարէներուն արիւնը թափեցին. և դուն անոնց արիւն խմել տուիր, քանզի արժանի են: 7Եւ սեղանէն լսեցի` որ կ’ըսէր, Այո, Ամենակալ Տէր Աստուած, քու դատաստաններդ արդար ու ճշմարիտ են: 8Եւ չորրորդ հրեշտակը իր սկաւառակը արևին վրայ թափեց: 9Ու անոր զօրութիւն տրուեցաւ որ խորշակահար ընէ մարդիկը կրակով. և սաստիկ տաքէն խորշակահար եղան մարդիկ, և հայհոյեցին Աստուծոյ անունը, որ այս հարուածներուն վրայ իշխանութիւն ունի. ու չապաշխարեցին որ անոր փառք տան: 10Եւ հինգերորդ հրեշտակը իր սկաւառակը գազանին աթոռին վրայ թափեց, ու անոր թագաւորութիւնը խաւարեցաւ. և ցաւէն լեզուներնին կը ծամէին. 11Ու երկինքի Աստուածը հայհոյեցին իրենց ցաւերուն և իրենց պալարներուն պատճառաւ. ու իրենց գործերէն չապաշխարեցին: 12Եւ վեցերորդ հրեշտակը իր սկաւառակը մեծ գետին, Եփրատի, վրայ թափեց, ու անոր ջուրերը ցամքեցան, որպէս զի արևելքի թագաւորներուն ճամբան պատրաստուի: 13Եւ տեսայ որ վիշապին բերնէն ու գազանին բերնէն և սուտ մարգարէին բերնէն երեք պիղծ ոգիներ կ’ելլէին գորտերու նման, 14Վասն զի անոնք դևերու ոգիներ են` որ նշաններ կ’ընեն, ու բոլոր աշխարհի թագաւորներուն կ’երթան, որպէս զի զանոնք Ամենակալ Աստուծոյ այն մեծ օրուանը պատերազմին համար ժողվեն. 15(Ահա գողի պէս կու գամ. երանի՜ անոր որ արթուն կը կենայ ու իր հանդերձները կը պահէ, որպէս զի մերկ չպտըտի ու իր ամօթը երևնայ.) 16Եւ զանոնք տեղ մը ժողվեցին, որ Եբրայեցերէն Արմագեդոն կ’ըսուի: 17Ու եօթներորդ հրեշտակը իր սկաւառակը օդին վրայ թափեց, ու երկինքի տաճարէն, աթոռէն, մեծ ձայն մը ելաւ` ըսելով, Եղաւ: 18Եւ փայլակներ ու ձայներ և որոտումներ* եղան ու մեծ երկրաշարժ մը եղաւ, այնպէս որ մարդոց երկրի վրայ ըլլալէն ի վեր այնպիսի մեծ երկրաշարժ մը եղած չէր: 19Եւ մեծ քաղաքը երեք մաս եղաւ, ու ազգերուն քաղաքները կործանեցան, և մեծ Բաբելոնը Աստուծոյ առջև յիշուեցաւ, որպէս զի իր սաստիկ բարկութեան գինիին գաւաթը անոր տայ: 20Եւ ամէն կղզի փախաւ, ու լեռները չգտնուեցան: 21Եւ խոշոր կարկուտ գրեթէ տաղանդի մը կշիռքով երկինքէն կ’իջնէր մարդոց վրայ. ու մարդիկ հայհոյեցին զԱստուած կարկուտին հարուածին համար, վասն զի խիստ մեծ էր այն հարուածը: