Բաբելոնին անկումը

1Եւ ասկէ ետքը [ուրիշ] հրեշտակ մը տեսայ որ երկինքէն կ’իջնէր, և մեծ իշխանութիւն ունէր, ու երկիր անոր փառքէն լուսաւորուեցաւ: 2Եւ զօրաւոր ձայնով աղաղակեց` ըսելով, Ինկաւ, ինկաւ մեծ Բաբելոն, և դևերու բնակարան եղաւ, ու բոլոր պիղծ ոգիներու արգելանոց, և բոլոր պիղծ ու ատելի թռչուններու վանդակ. 3Վասն զի անոր կատաղի պոռնկութեանը գինիէն խմեցին բոլոր ազգերը, ու երկրի թագաւորները անոր հետ պոռնկեցան, և երկրի վաճառականները անոր չափազանց զեղխութենէն հարստացան: 4Ու երկինքէն ուրիշ ձայն մը լսեցի որ կ’ըսէր, Ելէք ատոր մէջէն, իմ ժողովուրդս, որպէս զի ատոր մեղքերուն հաղորդ չըլլաք, ու ատոր հարուածներէն բաժին չառնէք. 5Վասն զի ատոր մեղքերը մինչև երկինք հասան կցուեցան. ու Աստուած ատոր անիրաւութիւնները յիշեց: 6Հատուցէք ատոր` ինչպէս ինք հատուց. ու իր գործերուն համեմատ կրկնապատիկ փոխարինեցէք ատոր. այն գաւաթը զոր ինք լեցուց` կրկնապատիկ լեցուցէք իրեն: 7Որչափ որ փառաւորեց զինք և զեղխութեամբ ապրեցաւ, այնչափ ալ տանջանք և սուգ հատուցէք անոր. վասն զի իր սրտին մէջ կ’ըսէ թէ Ես թագուհի կը նստիմ, ու որբևարի չեմ, ու բնաւ սուգ պիտի չտեսնեմ: 8Անոր համար մէկ օրուան մէջ պիտի գան ատոր հարուածները, մահ ու սուգ և սով, ու կրակով պիտի այրի. վասն զի հզօր է Տէր Աստուած որ զանիկա դատեց: 9Ու երկրի թագաւորները, որ ատոր հետ պոռնկեցան ու հեշտացան, պիտի լան ու կոծեն ատոր վրայ երբ ատոր հրկիզութեանը ծուխը տեսնեն. 10Եւ ատոր տանջանքին վախէն հեռուն պիտի կայնին ու ըսեն, Վա՜յ, վայ քեզի, մեծ Բաբելոն քաղաք, հզօր քաղաք, որ մէկ ժամու մէջ եկաւ քու դատաստանդ: 11Ու երկրի վաճառականները պիտի ողբան ու սուգ ընեն անոր վրայ. վասն զի ալ մէ°կը ծախու չառներ անոնց վաճառքը, 12Ոսկիի, ու արծաթի, և պատուական քարերու, ու մարգարիտներու, և բեհեզի, ու ծիրանիի, և մետաքսի, ու որդան կարմիրի վաճառքը, և ամէն խունկի փայտերը, ու ամէն փղոսկրեայ ամանները, և ամէն պատուական փայտէ ու պղնձէ և երկաթէ ու մարմարիոնէ ամանները, 13Եւ կինամոնը, [ու ամոմոնը] և խունկերը, ու անուշահոտ իւղը, ու կնդրուկը, և գինին, ու ձէթը, և նաշիհը, ու ցորենը, և արջառները, ու ոչխարները, և ձիերը, ու կառքերը, և մարմինները ու մարդոց հոգիները: 14Եւ քու հոգիիդ ցանկացած պտուղները քեզմէ գացին, ու բոլոր շքեղ ու փայլուն բաները քեզմէ կորսուեցան, և ա°լ բնաւ պիտի չգտնես զանոնք: 15Այս բաներուն վաճառականները, որոնք անկէ հարստացած էին, հեռուն պիտի կայնին անոր տանջանքին վախէն` լալով ու սուգ ընելով, 16Ու պիտի ըսեն, Վա¯յ, վա¯յ, մեծ քաղաք, որ բեհեզ ու ծիրանի և որդան կարմիր հագած էիր, ու ոսկիով և պատուական քարերով ու մարգարիտներով զարդարուած էիր. 17Վասն զի այնքան հարստութիւնը մէկ ժամու մէջ փճացաւ: Ու ամէն նաւավարները, և այն ամէնը որ նաւով տեղ տեղ կ’երթան, ու նաւաստիները և որոնք որ ծովու մէջ կը բնակին, հեռուն կայնեցան. 18Եւ տեսնելով անոր հրկիզութեան ծուխը` կ’աղաղակէին` ըսելով, Ո՞վ նման է այս մեծ քաղաքին. 19Ու իրենց գլուխներուն վրայ հող ցանեցին, և լալով ու սուգ ընելով` կ’աղաղակէին` ըսելով, Վա՜յ, վա՜յ այն մեծ քաղաքին, որուն մէջ իր պատուականութենէն հարստացան ամէնը որոնք նաւեր ունէին ծովուն վրայ. վասն զի մէկ ժամու մէջ ամայացաւ: 20Ուրախացէք անոր վրայ, երկինք ու սուրբ առաքեալներ և մարգարէներ, որ Աստուած ձեր վրէժը անկէ առաւ: 21Եւ զօրաւոր հրեշտակ մը քար մը առաւ աղօրիքի մեծ քարի նման, ու ծովը ձգեց` ըսելով, Այսպէս ուժով վար պիտի ձգուի Բաբելոն մեծ քաղաքը, ու ա°լ պիտի չգտնուի: 22Եւ քնարահարներուն ու երաժիշտներուն և սրնգահարներուն ու փողահարներուն ձայնը ա°լ պիտի չլսուի քու մէջդ. և արհեստի վարպետ մը ա°լ պիտի չգտնուի քու մէջդ. ու աղօրիքին ձայնը ա°լ պիտի չլսուի քու մէջդ. 23Եւ ճրագին լոյսը ա°լ պիտի չերևնայ քու մէջդ. ու փեսային ձայնը և հարսին ձայնը ա°լ պիտի չլսուի քու մէջդ. քանզի քու վաճառականներդ երկրի մեծամեծներն էին. վասն զի քու կախարդութիւնովդ բոլոր ազգերը մոլորեցան: 24Եւ մարգարէներուն ու սուրբերուն ու երկրի վրայ բոլոր սպաննուածներուն արիւնը անոր մէջ գտնուեցաւ: