1Եւ անկէ ետքը շատ բազմութեան մեծ ձայն մը լսեցի երկինքը` ըսելով, Ալէլուիա. փրկութիւն ու փառք և պատիւ և զօրութիւն մեր Աստուծոյն. 2Վասն զի ճշմարիտ ու արդար են անոր դատաստանները, քանզի դատեց այն մեծ պոռնիկը, որ իր պոռնկութիւնովը երկիրը ապականեց, ու իր ծառաներուն արեան վրէժը անոր ձեռքէն պահանջեց: 3Եւ կրկին անգամ ըսին, Ալէլուիա. ու անոր ծուխը յաւիտեանս յաւիտենից կ’ելլէ:

Գառնուկին հարսանիքին ընթրիքը

4Եւ քսանըչորս երէցները ու չորս կենդանիները ինկան ու երկրպագութիւն ըրին Աստուծոյ` որ աթոռը կը նստի, ըսելով, Ամէն, Ալէլուիա: 5Եւ աթոռէն ձայն մը ելաւ` ըսելով, Մեր Աստուծոյն օրհնութիւն տուէք, իր բոլոր ծառաները, ու դուք որ իրմէ կը վախնաք, պզտիկներ ու մեծեր: 6Եւ լսեցի շատ բազմութեան ձայնի պէս, ու շատ ջուրերու ձայնի պէս, ու սաստիկ որոտումներու ձայնի պէս, որոնք կ’ըսէին, Ալէլուիա, վասն զի [մեր] Ամենակալ Տէր Աստուածը թագաւորեց. 7Խնդանք և ուրախանանք ու փառք տանք անոր, քանզի Գառնուկին հարսնիքը հասաւ, ու անոր կինը ինքզինք պատրաստեց: 8Եւ իրեն տրուեցաւ որ մաքուր ու լուսափայլ բեհեզ հագնի, (քանզի այն բեհեզը սուրբերուն արդարութիւնն է:) 9Եւ ինծի ըսաւ, Գրէ. Երանելի են անոնք որ Գառնուկին հարսանեաց ընթրիքին կանչուած են. ու ինծի ըսաւ, Ասոնք են Աստուծոյ ճշմարիտ խօսքերը: 10Ես ալ անոր ոտքերուն առջև ինկայ, որպէս զի անոր երկրպագութիւն ընեմ. ու ըսաւ ինծի, Զգուշացիր, մի ընէր. վասն զի ես ալ քու ծառայակիցդ եմ ու քու եղբայրներուդ` որոնք Յիսուսի վկայութիւնը ունին. Աստուծոյ երկրպագութիւն ըրէ. (վասն զի Յիսուսի վկայութիւնը մարգարէութեան հոգին է:)

Ճերմակ ձիաւորը

11Եւ տեսայ երկինքը բացուած. և ահա ճերմակ ձի մը, ու անոր վրայ հեծնողը Հաւատարիմ ու Ճշմարիտ կ’ըսուի, և արդարութեամբ դատաստան կը տեսնէ ու կը պատերազմի. 12Եւ անոր աչքերը կրակի բոցի պէս էին, ու անոր գլխուն վրայ շատ թագեր կային, ու գրուած անուն մը ունէր` զոր մէ°կը չգիտեր, բայց միայն ինք. 13Եւ արիւնով ներկուած հանդերձ մը հագեր էր. ու անոր անունը Բան Աստուծոյ կ’ըսուի: 14Ու երկինքի մէջ եղող զօրքերը անոր ետեւէն կ’երթային ճերմակ ձիերով, ճերմակ ու մաքուր բեհեզներ հագած: 15Եւ անոր բերնէն սրած սուր մը կ’ելլէր, որպէս զի անով ազգերը զարնէ. ու ինք երկաթէ գաւազանով պիտի հովուէ զանոնք, ու Ամենակալ Աստուծոյ սաստիկ բարկութեանը գինիին հնձանը ինք պիտի կոխէ: 16Եւ իր պատմուճանին վրայ ու իր ազդրին վրայ գրուած գիր մը ունէր, ԹԱԳԱՒՈՐ ԹԱԳԱՒՈՐԱՑ ԵՒ ՏԷՐ ՏԷՐԱՆՑ 17Եւ հրեշտակ մը տեսայ, որ արևին մէջ կայներ էր, ու մեծ ձայնով աղաղակեց երկինքի մէջ թռչող բոլոր թռչուններուն` ըսելով, Եկէք, Աստուծոյ մեծ ընթրիքին ժողվուեցէք, 18Որպէս զի ուտէք թագաւորներուն մարմինները, ու հազարապետներուն մարմինները, զօրաւորներուն մարմինները, ու ձիերուն և անոնց վրայ հեծնողներուն մարմինները, ու ամէնուն մարմինները, թէ° ազատներուն և թէ° ծառաներուն, թէ° պզտիկներուն և թէ° մեծերուն: 19Եւ տեսայ գազանը ու երկրի թագաւորները ու անոնց զօրքերը մէկտեղ ժողվուած պատերազմ ընելու անոր հետ` որ ձիուն վրայ հեծեր էր, ու անոր զօրքերուն հետ: 20Եւ գազանը բռնուեցաւ, ու անոր հետ սուտ մարգարէն` որ անոր առջև նշաններ ըրաւ, որոնցմով մոլորեցուց գազանին դրոշմը ընդունողները, և անոր պատկերին երկրպագութիւն ընողները. երկուքն ալ ողջ ողջ ծծումբով վառած կրակին լիճը ձգուեցան: 21Եւ ուրիշներն ալ սպաննուեցան ձիուն վրայ հեծնողին սուրէն` որ իր բերնէն կ’ելլէր, ու բոլոր թռչունները անոնց մարմիններէն կշտացան: