Պատգամ Եփեսոսին

1Եփեսոսի մէջ եղած եկեղեցւոյն հրեշտակին գրէ. Այսպէս կ’ըսէ անիկա որ իր աջ ձեռքին մէջ եօթը աստղերը ունի, ու եօթը ոսկեղէն աշտանակներուն մէջ կը պտըտի. 2Գիտեմ քու գործերդ և քու աշխատութիւնդ ու քու համբերութիւնդ, և որ չարերուն չես կրնար տանիլ, ու փորձեցիր զանոնք որ կ’ըսեն թէ իրենք առաքեալ են, ու չեն, և գտար թէ ստախօս են. 3Ու համբերութիւն ունենալով` նեղութիւն կրեցիր իմ անուանս համար* ու չթուլցար: 4Բայց քեզի դէմ բան մը ունիմ, որ քու առաջուան սէրդ ձգեցիր: 5Միտքդ բեր հիմա ուրկէ որ ինկար, ու ապաշխարէ և քու առաջուան գործերդ ըրէ. եթէ ոչ` շուտով կու գամ քեզի, ու քու աշտանակդ իր տեղէն պիտի շարժեմ` եթէ չապաշխարես: 6Բայց ասիկա ունիս, որ Նիկողայոսեանց գործերը կ’ատես, զորոնք ես ալ կ’ատեմ: 7Ան որ ականջ ունի, թող լսէ թէ Հոգին ի՛նչ կ’ըսէ եկեղեցիներուն. Ան որ կը յաղթէ, անոր ուտել պիտի տամ կենաց ծառէն` որ Աստուծոյ դրախտին մէջ է:

Պատգամ Զմիւռնիային

8Եւ Զմիւռնիայի մէջ եղած եկեղեցւոյն հրեշտակին գրէ. Այսպէս կ’ըսէ Առաջինը ու Վերջինը, որ մեռաւ ու կենդանացաւ. 9Գիտեմ քու գործերդ ու նեղութիւնդ և աղքատութիւնդ, (բայց հարուստ ես,) ու անոնց հայհոյութիւնը` որ կ’ըսեն թէ իրենք Հրեայ են, ու չեն, հապա սատանայի ժողովք մը: 10Բնաւ մի վախնար այն բաներէն զորոնք պիտի կրես. ահա բանսարկուն ձեզմէ մէկ քանիները բանտը պիտի ձգէ որպէս զի փորձուիք, և տասը օր նեղութիւն պիտի ունենաք. մինչև ի մահ հաւատարիմ եղիր, ու քեզի կենաց պսակը պիտի տամ: 11Ան որ ականջ ունի, թող լսէ թէ Հոգին ի՛նչ կ’ըսէ եկեղեցիներուն: Ան որ կը յաղթէ, երկրորդ մահէն պիտի չվնասուի:

Պատգամ Պերգամոնին

12Եւ Պերգամոնի մէջ եղած եկեղեցւոյն հրեշտակին գրէ. Այսպէս կ’ըսէ անիկա որ սրած երկբերան սուրը ունի. 13Գիտեմ քու գործերդ, և թէ ո՛ւր կը բնակիս, այսինքն սատանայի աթոռին եղած տեղը, ու իմ անունս կը պահես, և իմ հաւատքս չուրացար այն օրերը անգամ` որ Անթիպաս իմ հաւատարիմ վկաս սպաննուեցաւ ձեր մէջ, ուր սատանայ կը բնակի: 14Բայց քեզի դէմ քիչ մը բան ունիմ, որ հոդ Բաղաամի վարդապետութիւնը բռնողներ ունիս, որ Բաղակի սորվեցուց Իսրայէլի որդիներուն առջև գայթակղութիւն դնել, որպէս զի անոնք կուռքերու զոհուածներ ուտեն ու պոռնկութիւն ընեն: 15Այսպէս ալ դուն Նիկողայոսեանց վարդապետութիւնը բռնողներ ունիս, զոր ես կ’ատեմ: 16[Ուստի] ապաշխարէ. եթէ ոչ` շուտով կու գամ քեզի, ու իմ բերնիս սրովը պիտի պատերազմիմ անոնց հետ: 17Ան որ ականջ ունի, թող լսէ թէ Հոգին ի՛նչ կ’ըսէ եկեղեցիներուն. Ով որ կը յաղթէ, պահուած մանանայէն ուտել պիտի տամ անոր, ու ճերմակ խիճ մը պիտի տամ անոր, և այն խիճին վրայ նոր անուն մը գրուած, զոր մէ՛կը չգիտեր, բայց միայն ան` որ կ’ընդունի:

Պատգամ Թիւատիրին

18Եւ Թիւատիրի մէջ եղած եկեղեցւոյն հրեշտակին գրէ. Այսպէս կ’ըսէ Աստուծոյ Որդին, որ կրակի բոցի պէս աչքեր ունի, ու իր ոտքերը ոսկեպղինձի նման են. 19Գիտեմ քու գործերդ և սէրդ ու ծառայութիւնդ, և քու հաւատքդ ու համբերութիւնդ, և թէ քու վերջին գործերդ առաջիններէն շատ են: 20Բայց քեզի դէմ բան մը* ունիմ, որ թող կու տաս Յեզաբէլ կինը, որ ինքզինք մարգարէուհի կ’անուանէ, ու իմ ծառաներս մոլորեցնելով` կը սորվեցնէ պոռնկութիւն ընել և կուռքերու զոհուածներ ուտել: 21Եւ ես անոր ժամանակ տուի իր պոռնկութեանը վրայ ապաշխարելու, ու չապաշխարեց: 22Ահա ես զանիկա անկողին պիտի ձգեմ, ու անոր հետ շնութիւն ընողները` մեծ նեղութեան մէջ, եթէ իրենց գործերուն վրայ չապաշխարեն: 23Եւ անոր զաւակները մահով պիտի սպաննեմ. ու բոլոր եկեղեցիները պիտի գիտնան թէ ես ան եմ` որ երիկամունքները ու սիրտերը կը քննեմ. և ամէն մէկուդ ձեր գործերուն համեմատ պիտի հատուցանեմ: 24Բայց ձեզի կ’ըսեմ միւսներուդ որ Թիւատիրի մէջ էք, ու այս վարդապետութիւնը չունիք, որ չճանչցաք սատանայի խորունկ բաները, (ինչպէս կ’ըսեն,) Ձեր վրայ ուրիշ ծանրութիւն չեմ ձգեր. 25Հապա զայն որ ունիք` պահեցէք մինչև ես գամ: 26Եւ ան որ կը յաղթէ ու իմ գործերս մինչև վերջը կը պահէ, անոր իշխանութիւն պիտի տամ ազգերուն վրայ, 27(Եւ պիտի հովուէ զանոնք երկաթէ գաւազանով. անոնք բրուտի ամաններու պէս պիտի փշրուին.) 28Ինչպէս ես ալ իմ Հօրմէս առի. ու անոր պիտի տամ առաւօտեան աստղը: 29Ան որ ականջ ունի, թող լսէ թէ Հոգին ի՛նչ կ’ըսէ եկեղեցիներուն: