1Եւ ինծի կենաց ջուրի գետ մը ցուցուց ակնվանիի պէս պայծառ, որ կ’ելլէր Աստուծոյ ու Գառնուկին աթոռէն: 2Եւ այն քաղաքին հրապարակին մէջ, ու այն գետին մէկ կողմէն ու միւս կողմէն կենաց ծառ կար` որ տասուերկու կերպ պտուղ կը բերէր, ու ամէն ամիս իր պտուղը կու տար. և այն ծառին տերևները հեթանոսներուն բժշկութիւն կ’ըլլար: 3Եւ ա°լ բնաւ նզովք պիտի չըլլայ. ու անոր մէջ պիտի ըլլայ Աստուծոյ ու Գառնուկին աթոռը, և անոր ծառաները պիտի պաշտեն զանիկա. 4Եւ անոր երեսը պիտի տեսնեն, ու անոր անունը իրենց ճակատներուն վրայ պիտի ըլլայ: 5Եւ հոն ա°լ գիշեր պիտի չըլլայ, և ճրագ ու արևու լոյս պէտք չէ. քանզի Տէր Աստուած պիտի լուսաւորէ զանոնք, և յաւիտեանս յաւիտենից պիտի թագաւորեն:

Յիսուսին գալուստը

6Եւ ըսաւ ինծի, Այս խօսքերը հաւատարիմ են ու ճշմարիտ. և սուրբ մարգարէներուն* Տէր Աստուածը իր հրեշտակը ղրկեց` իր ծառաներուն ցուցնելու ինչ որ շուտով պէտք է ըլլալ: 7Ահա ես շուտով կու գամ. երանի՜ անոր որ կը պահէ այս գիրքին մարգարէութեան խօսքերը: 8Եւ ես Յովհաննէս լսեցի ու տեսայ այս բաները. և երբ լսեցի ու տեսայ, ինկայ որ երկրպագութիւն ընեմ այն հրեշտակին ոտքերուն առջև` որ այս բաները ինծի կը ցուցնէր: 9Եւ ըսաւ ինծի, Զգուշացիր, մի ըներ վասն զի ես քուկին ու քու եղբայրներուդ, մարգարէներուն, և այս գիրքին խօսքերը պահողներուն ծառայակիցն եմ. Աստուծոյ երկրպագութիւն ըրէ: 10Եւ ըսաւ ինծի, Այս գիրքին մարգարէութեան խօսքերը մի կնքեր, վասն զի ժամանակը մօտ է: 11Ան որ անիրաւութիւն կ’ընէ` ալ անիրաւութիւն թող ընէ, ու ան որ աղտոտ է` ալ աղտոտ ըլլայ, և ան որ արդար է` ալ արդար ըլլայ, ու ան որ սուրբ է՝ ալ սուրբ ըլլայ: 12Ահա ես շուտով կու գամ, և իմ վարձքս ինծի հետ է` ամէն մէկուն իր գործին համեմատ հատուցանելու: 13Ես եմ Ալֆա և Օմէղա, Առաջինը ու Վերջինը, Սկիզբը և Վախճանը: 14Երանելի են անոնք որ անոր պատուիրանքները կը կատարեն, որպէս զի իշխանութիւն ունենան կենաց ծառին վրայ, և դռներէն ներս քաղաքը մտնեն: 15Բայց դուրս պիտի մնան շուները ու կախարդները և պոռնիկները ու սպանութիւն ընողները և կռապաշտները ու այն ամէնը որ ստութիւն կը սիրէ և կ’ընէ: 16Ես Յիսուս իմ հրեշտակս ղրկեցի` այս բաները ձեզի վկայելու եկեղեցիներուն մէջ. ես Դաւիթի արմատը ու ցեղն եմ, ու առաւօտեան պայծառ աստղը: 17Եւ Հոգին ու հարսը կ’ըսեն, Եկուր. և ան որ կը լսէ` թող ըսէ, Եկուր. ու ան որ ծարաւ է` թող գայ, և ան որ կ’ուզէ` կենաց ջուրը ձրի առնէ:

Վերջաբան

18Ես կը վկայեմ ամէնուն` որ այս գիրքին մարգարէութեան խօսքերը կը լսէ. եթէ մէկը ասոնց վրայ բան մը աւելցընէ, Աստուած ալ անոր վրայ պիտի աւելցնէ այն հարուածները որոնք այս գիրքին մէջ գրուած են. 19Եւ եթէ մէկը այս մարգարէութեան գիրքին խօսքերէն բան մը պակսեցնէ, Աստուած ալ անոր բաժինը պիտի պակսեցնէ կենաց գիրքէն և սուրբ քաղաքէն` որ այս գիրքին մէջ գրուած են: 20Այս բաներուն վկայութիւն տուողը կ’ըսէ, Այո, շուտով կու գամ ես: Ամէն, եկուր, Տէր Յիսուս: 21Մեր Տէրոջը Յիսուս Քրիստոսի շնորհքը ձեր ամէնուն հետ ըլլայ: Ամէն: