Պատգամ Սարդիկէին

1Եւ Սարդիկէի մէջ եղած եկեղեցւոյն հրեշտակին գրէ. Այսպէս կ’ըսէ անիկա որ ունի Աստուծոյ եօթը Հոգիները ու եօթը աստղերը. Գիտեմ քու գործերդ` որ դուն անուն ունիս թէ կենդանի ես, ու մեռած ես: 2Արթուն կեցիր և հաստատէ մնացած բաները որոնք մեռնելու վրայ են, վասն զի քու գործերդ Աստուծոյ առջև կատարեալ չգտայ: 3Հիմա միտքդ բեր թէ ի՛նչպէս ընդունեցիր ու լսեցիր, ու պահէ և ապաշխարէ. բայց եթէ արթննալու չըլլաս, գողի պէս քու վրադ պիտի գամ, ու բնաւ պիտի չգիտնաս թէ ո՛ր ժամուն քու վրադ պիտի գամ: 4Սակայն քանի մը անձեր ունիս Սարդիկէի մէջ, որոնք իրենց հանդերձները չաղտոտեցին, և ճերմակներով պիտի պտըտին ինծի հետ, քանզի արժանի են: 5Ան որ կը յաղթէ` ճերմակներ պիտի հագնի, ու ես անոր անունը կենաց գիրքէն պիտի չաւրեմ. և անոր անունը պիտի դաւանիմ իմ Հօրս առջև ու անոր հրեշտակներուն առջև: 6Ան որ ականջ ունի, թող լսէ թէ Հոգին ի՛նչ կ’ըսէ եկեղեցիներուն:

Պատգամ Փիղադեղփիային

7Եւ Փիղադեղփիայի մէջ եղած եկեղեցւոյն հրեշտակին գրէ. Այսպէս կ’ըսէ այն Սուրբը, այն Ճշմարիտը որ Դաւիթի բանալին ունի. կը բանայ ու մէ՛կը չկայ որ գոցէ, և կը գոցէ ու մէ՛կը չկայ որ բանայ. 8Գիտեմ քու գործերդ. ահա քու առջևդ բացուած դուռ մը դրի, զոր մէ՛կը չկրնար գոցել. վասն զի դուն քիչ մը կարողութիւն ունիս, և իմ խօսքս պահեցիր ու իմ անունս չուրացար: 9Ահա ես քեզի կու տամ սատանայի ժողովքէն եղողները, որոնք կ’ըսեն թէ իրենք Հրեայ են ու չեն, հապա սուտ կ’ըսեն. ահա պիտի ստիպեմ զանոնք որ գան ու երկրպագութիւն ընեն քու ոտքերուդ առջև, և ճանչնան թէ ես քեզ սիրեցի: 10Որովհետև իմ համբերութեանս խօսքը պահեցիր, ես ալ քեզ պիտի պահեմ փորձութեան ժամանակ, որ պատրաստ է գալու բոլոր աշխարհի վրայ` երկրի երեսը բնակողները փորձելու համար: 11Ահա ես շուտով կու գամ. ունեցածդ ամուր բռնէ, որպէս զի մէ՛կը չառնէ քու պսակդ: 12Ան որ կը յաղթէ, անիկա իմ Աստուծոյս տաճարին մէջ սիւն մը պիտի ընեմ, ու ալ դուրս պիտի չելլէ. և անոր վրայ իմ Աստուծոյս անունը պիտի գրեմ, ու իմ Աստուծոյս քաղաքին անունը, այսինքն նոր Երուսաղէմի, որ երկինքէն իմ Աստուծմէս կ’իջնէ, և իմ նոր անունս. 13Ան որ ականջ ունի, թող լսէ թէ Հոգին ի՛նչ կ’ըսէ եկեղեցիներուն:

Պատգամ Լաւոդիկէին

14Եւ Լաւոդիկէի մէջ եղած եկեղեցւոյն հրեշտակին գրէ. Այսպէս կ’ըսէ Ամէնը, հաւատարիմ ու ճշմարիտ Վկան, Աստուծոյ արարածներուն Սկիզբը. 15Գիտեմ քու գործերդ, որ ոչ պաղ ես ու ոչ տաք. երանի՜ թէ պաղ ըլլայիր կամ տաք: 16Ուստի դուն որ գաղջ ես, ու ոչ տաք` ոչ ալ պաղ, քեզ բերնէս դուրս փսխելու վրայ եմ. 17Քանզի կ’ըսես, Ես հարուստ եմ ու մեծցայ, և բանի մը կարօտ չեմ. ու չես գիտեր որ դուն խեղճ ու թշուառական ես, և աղքատ ու կոյր ու մերկ: 18Ես քեզի խորհուրդ կու տամ. ինծմէ կրակի մէջ փորձուած ոսկի ծախու առ, որպէս զի հարստանաս, ու ճերմակ հանդերձներ` որպէս զի հագնիս, որպէս զի քու ամօթալի մերկութիւնդ չերևնայ. և աչքերդ դեղ դիր որպէս զի տեսնես: 19Ես իմ ամէն սիրածս կը հանդիմանեմ ու կը խրատեմ. ուստի նախանձաւոր եղիր ու ապաշխարէ: 20Ահա ես դուռը կայներ եմ ու կը զարնեմ. եթէ մէկը իմ ձայնս լսէ ու դուռը բանայ. անոր քով պիտի մտնեմ և անոր հետ ընթրիք պիտի ընեմ, ան ալ ինծի հետ: 21Ան որ կը յաղթէ, ինծի հետ իմ աթոռս նստել պիտի տամ անոր, ինչպէս ես ալ յաղթեցի ու իմ Հօրս հետ անոր աթոռը նստայ: 22Ան որ ականջ ունի, թող լսէ թէ Հոգին ի՛նչ կ’ըսէ եկեղեցիներուն: