1Եւ հինգերորդ հրեշտակը փողը հնչեցուց, ու տեսայ որ երկինքէն աստղ մը ինկաւ երկրի վրայ. և անդունդի գուբին բանալին անոր տրուեցաւ. 2Ու անդունդին գուբը բացաւ, ու այն գուբէն ծուխ կ’ելլէր մեծ հնոցի մը ծուխին պէս. ու խաւարեցաւ արևը ու օդը գուբին ծուխէն: 3Եւ ծուխէն մարախներ կ’ելլէին երկրի վրայ, ու անոնց զօրութիւն տրուեցաւ երկրի կարիճներուն ունեցած զօրութեանը պէս. 4Եւ անոնց ըսուեցաւ որ չվնասեն երկրի խոտին, ոչ ալ կանանչեղէնի մը և ոչ ծառի մը, հապա միայն այն մարդոց, որոնք իրենց ճակատներուն վրայ Աստուծոյ կնիքը չունին: 5Եւ անոնց հրաման տրուեցաւ որ չսպաննեն զանոնք, հապա չարչարեն զանոնք հինգ ամիս. ու անոնց տուած չարչարանքը կարիճի տուած չարչարանքին պէս էր` երբ մարդը կը զարնէ: 6Եւ այն օրերը մարդիկ մահը պիտի փնտռեն ու պիտի չգտնեն. և պիտի ուզեն մեռնիլ, ու մահը անոնցմէ պիտի փախչի: 7Եւ մարախներուն նմանութիւնը` պատերազմի պատրաստուած ձիերու պէս, ու անոնց գլուխներուն վրայ ոսկեղէն պսակներու պէս, և անոնց երեսները մարդոց երեսներու պէս էին. 8Ու անոնք մազեր ունէին կիներու մազերուն պէս, ու անոնց ակռաները առիւծներու ակռաներուն պէս էին: 9Եւ զրահներ ունէին երկաթէ զրահներու պէս. ու անոնց թևերուն ձայնը պատերազմի վազող շատ ձիեր լծուած կառքերու ձայնին պէս էր: 10Եւ կարիճներու նման պոչեր ունէին, ու պոչերնուն վրայ խայթոց. և իշխանութիւն ունէին հինգ ամիս մարդոց վնասելու: 11Եւ իրենց վրայ թագաւոր ունէին անդունդին հրեշտակը, որուն անունը Եբրայեցերէն Աբադոն, և Յոյն լեզուով կ’ըսուի Ապողղիոն: 12Մէկ վայը անցաւ. ասկէ ետև ահա երկու վայեր ալ կու գան: 13Եւ վեցերորդ հրեշտակը փողը հնչեցուց, ու ձայն մը լսեցի Աստուծոյ առջև եղող ոսկի սեղանին չորս եղջիւրներէն, 14Որ կ’ըսէր վեցերորդ հրեշտակին որ փողը ունէր, Եփրատ մեծ գետին վրայ կապուած չորս հրեշտակները արձակէ: 15Եւ այն չորս հրեշտակները արձակուեցան, որ պատրաստուած էին ժամի ու օրուան և ամիսի ու տարիի համար, որպէս զի մարդոց երրորդ մասը մեռցնեն: 16Եւ ձիաւոր զօրքերուն համրանքը երկու բիւրք բիւրուց էր, ու լսեցի անոնց համրանքը: 17Եւ տեսիլքին մէջ այսպէս տեսայ ձիերը, ու անոնց վրայ հեծնողները` որոնք ունէին հրեղէն ու յակնթեղէն և ծծմբեղէն զրահներ. և ձիերուն գլուխները առիւծներու գլուխներուն պէս էին, ու անոնց բերնէն կրակ ու ծուխ և ծծումբ կ’ելլէր: 18Այս երեք [հարուած]ներէն մարդոց երրորդ մասը մեռաւ, այսինքն կրակէն ու ծուխէն ու ծծումբէն, որոնք անոնց բերնէն կ’ելլէին: 19Վասն զի անոնց զօրութիւնը բերաններնուն մէջ է ու պոչերնուն մէջ. քանզի անոնց պոչերը օձերու նման էին, գլուխներ ունէին որոնցմով կը վնասէին: 20Եւ ուրիշ մարդիկ որոնք այս հարուածներէն չսպաննուեցան, իրենց ձեռքերուն գործերէն չապաշխարեցին, որ երկրպագութիւն չընեն դևերուն, ու ոսկիէ և արծաթէ ու պղնձէ և քարէ ու փայտէ շինուած կուռքերուն, որոնք ոչ կրնան տեսնել, ոչ ալ լսել ու ոչ քալել. 21Նաև չապաշխարեցին իրենց մարդասպանութիւններէն, ոչ ալ իրենց կախարդութիւններէն, ոչ ալ իրենց պոռնկութենէն և ոչ իրենց գողութիւններէն: