Հնազանդութիւն իշխանութիւններուն

1Ամէն մարդ իր վրայ եղած իշխանութիւններուն թող հնազանդի. վասն զի չկայ իշխանութիւն մը որ Աստուծմէ չըլլայ. և անոնք որ կան՝ Աստուծմէ կարգուած են։ 2Ուրեմն ով որ իշխանութեան դէմ կը կենայ, Աստուծոյ հրամանին դէմ կը կենայ. և անոնք որ դէմ կը կենան, անձերնուն դատապարտութիւն կ’ընդունին։ 3Վասն զի իշխանները բարի գործերու վախ տուող չեն, հապա չարերու. կ’ուզե՞ս չվախնալ իշխանութենէն. բարի գործէ, ու անկէ գովութիւն պիտի ընդունիս։ 4Վասն զի անիկա Աստուծոյ սպասաւորն է քեզի բարիի համար. բայց եթէ դուն չար կը գործես՝ վախցիր. վասն զի դատարկ տեղ մէջքը թուր չէ կապեր, քանզի Աստուծոյ սպասաւորն է, և վրէժխնդիր՝ բարկութիւն հասցնելու անոր վրայ որ չար կը գործէ։ 5Ասոր համար պէտք է հնազանդ ըլլալ, ոչ թէ միայն բարկութեանը համար, հապա խղճմտանքի համար ալ։ 6Այս պատճառաւ է որ տուրք ալ կու տաք. վասն զի Աստուծոյ սպասաւորներն են այն նոյն բանին հոգ տանելու։ 7Ուստի հատուցէք պէտք եղածը ամէնուն. որու որ տուրք տրուելու է՝ տուրքը, որու որ մաքս՝ մաքսը, որու որ վախ՝ վախնալը, որու որ պատիւ՝ պատիւը։

Իրարու հանդէպ սէր

8Բնաւ մէկուն պարտական մի գտնուիք, միայն թէ մէկզմէկ սիրելու. վասն զի ով որ ընկերը կը սիրէ՝ օրէնքը կը կատարէ: 9Վասն զի այն Մի շնարը, Մի սպանաները, Մի գողանարը, Սուտ վկայութիւն մի ըները, Մի ցանկարը, և ուրիշ ինչ պատուէր որ կայ՝ բոլորը այս խօսքին մէջ կը բովանդակուի, թէ Քու ընկերդ սիրես քու անձիդ պէս։ 10Սէրը ընկերին գէշութիւն չըներ. ուրեմն օրէնքին լրումը սէր է։ 11Եւ այսպէս ըրեք, գիտնալով այս ատեն, որ հիմա ժամանակ է մեզի քունէ արթննալու. վասն զի հիմա մօտ է մեզի փրկութիւնը՝ քան թէ այն ատեն որ հաւատացինք։ 12Գիշերը շատ անցած է ու ցորեկը մօտեցած. ուստի մէկդի ընենք խաւարին գործերը, ու մեր վրայ հագնինք լուսոյ զէնքերը։ 13Որպէս թէ ցորեկ ատեն՝ պարկեշտութեամբ պտըտինք, ոչ թէ անառակութիւններով ու գինովութիւններով, և ոչ թէ խառնակ անկողիններով ու պղծութիւններով, և ոչ թէ հակառակութիւնով ու նախանձով. 14Հապա ձեր վրայ հագէք Տէր Յիսուս Քրիստոսը, ու մարմնի խնամք մի տանիք ցանկութիւններու համար։