Ուրիշները հաճեցնել, ոչ թե ինքզինքդ

1Պէտք է մեզի որ կարող ենք՝ տկարներուն տկարութիւնը վերցնել, և ոչ թէ միայն մեր անձին հաճոյ ըլլալ. 2Հապա մեզմէ ամէն մէկը շինութեան համար իր ընկերին հաճոյ ըլլայ բարի բաներու մէջ։ 3Քանզի Քրիստոս ալ ոչ թէ իր անձին հաճոյ եղաւ, հապա ինչպէս գրուած է, Քեզ նախատողներուն նախատինքները իմ վրաս ինկան։ 4Վասն զի ինչ որ առաջուընէ գրուեցաւ, մեր սորվելուն համար գրուեցաւ, որպէս զի համբերութիւնով ու Գիրքերուն մխիթարութիւնովը յոյս ունենանք։ 5Եւ համբերութեան եւ մխիթարութեան Աստուածը տայ ձեզի իրարու հետ միևնոյն խորհուրդը ունենալ Քրիստոս Յիսուսի ուզածին պէս: 6Որպէս զի մէկ սրտով ու մէկ բերնով փառաւորէք զԱստուած ու մեր Տէրոջը Յիսուս Քրիստոսի Հայրը։

Աւետարանը՝ հեթանոսներուն

7Ասոր համար մէկզմէկ ընդունեցէք, վասն զի Քրիստոս ալ մեզ ընդունեց Աստուծոյ փառքին համար։ 8Բայց կ’ըսեմ թէ Յիսուս Քրիստոսի թլփատութեան պաշտօնեայ ըլլալը Աստուծոյ ճշմարտութեանը համար էր, որպէս զի նախահայրերուն տրուած խոստմունքները հաստատէ. 9Սակայն հեթանոսները ողորմութեան համար զԱստված փառաւորեն. ինչպէս գրուած է, Ասոր համար ազգերուն մէջ քեզ պիտի գովեմ, և քու անուանդ սաղմոս պիտի երգեմ։ 10Եւ դարձեալ կ’ըսէ թէ, Ով ազգեր, անոր ժողովուրդին ուրախակից եղէք։ 11Եւ դարձեալ թէ, Օրհնեցէք Տէրը, ով բոլոր ազգեր, ու գովեցէք զանիկա, ով բոլոր ժողովուրդներ։ 12Եւ դարձեալ Եսայի կ’ըսէ, Յեսսէի մէկ արմատը պիտի ըլլայ, ու ան որ ազգերուն իշխան պիտի կայնի, ազգերը անոր պիտի յուսան։ 13Արդ յուսոյ Աստուածը ձեզ լեցնէ բոլոր ուրախութիւնով ու խաղաղութիւնով հաւատալու մէջ, որպէս զի առատանաք յուսով Հոգւոյն Սրբոյ զօրութինովը։

Պօղոսին համարձակութեամբ գրելուն պատճառը

14Ես ինքս ալ հաստատուած եմ ձեզի համար, իմ եղբայրներս, որ դուք լեցուն էք բարութիւնով, լեցուած էք ամէն գիտութիւնով և կրնաք մէկզմէկ խրատել։ 15Սակայն մէկ կողմանէ համարձակաբար գրեցի ձեզի, իմ եղբայրներս, որպէս թէ միտքերնիդ ձգելով այս բաները այն շնորհքին պատճառաւ որ Աստուծմէ ինծի տրուած է, 16Որպէս զի ես Յիսուս Քրիստոսի սպասաւորը ըլլամ հեթանոսներուն մէջ, և Աստուծոյ աւետարանը մատակարարեմ, որպէս զի հեթանոսներուն ընծայուիլը ընդունելի ըլլայ՝ Սուրբ Հոգիով սրբուելով։ 17Ուստի Աստուծոյ քով պարծանք ունիմ Քրիստոս Յիսուսով։ 18Վասն զի չեմ համարձակիր խօսիլ այն բաներէն մէկը, զոր Քրիստոս իմ ձեռքովս գործած չէ հեթանոսները հնազանդեցնելու համար՝ խօսքով ու գործով, 19Նշաններու ու հրաշքներու զորութիւնով, Աստուծոյ Հոգւոյն զօրութիւնովը. այնպէս որ ես Երուսաղէմէ սկսած՝ և շրջան ընելով մինչև Լիւրիկացւոց կողմերը Քրիստոսի աւետարանը լեցուցի։ 20Այնպէս ջանացի աւետարանը քարոզել, ոչ թէ ուր որ Քրիստոսի անունը յիշուած էր, որ չըլլայ թէ ուրիշի մը դրած հիման վրայ շինեմ. հապա ինչպէս գրուած է թէ, 21Որոնց չպատմուեցաւ անոր վրայով՝ պիտի տեսնեն, ու որոնք չլսեցին՝ պիտի իմանան։

Պօղոսին ծրագիրը Հռովմ այցելելու

22Անոր համար ալ շատ արգիլուեցայ ձեզի գալէ։ 23Բայց հիմա որ այս կողմերը ա՛լ ինծի տեղ չկայ, ու շատ տարիներէ ի վեր խիստ կը փափաքիմ ձեզի գալ, 24Երբ դէպ ի Սպանիա երթամ, կը յուսամ որ անցնելու ատենս ձեզ տեսնեմ, ու ձեզմէ յուղարկուիմ հոն երթալու, եթէ առաջ քիչ մը ձեզմով լեցուիմ։ 25Բայց հիմա Երուսաղէմ կ’երթամ սուրբերուն սպասաւորելու։ 26Վասն զի Մակեդոնացիք և Աքայեցիք յօժարեցան որ Երուսաղէմի մէջ եղած աղքատ սուրբերուն քիչ մը հաղորդութիւն ընեն։ 27Յօժարեցան, քանզի անոնց պարտական ալ են. վասն զի եթէ անոնց հոգևոր բաներուն հաղորդ եղան հեթանոսները, կը պարտաւորին որ հաղորդութիւն ընեն անոնց՝ մարմնաւոր բաներու մէջ ալ։ 28Ուրեմն ասիկա կատարելով, ու կնքելով անոնց այս պտուղը, ձեզմէ Սպանիա պիտի անցնիմ։ 29Եւ զայս գիտեմ որ իմ ձեզի գալու ատենս՝ Քրիստոսի աւետարանին լեցուն օրհնութիւնովը պիտի գամ։ 30Ձեզի կ’աղաչեմ, եղբայրներ, մեր Տէր Յիսուս Քրիստոսով ու Հոգւոյն սիրովը, որ ինծի հետ պատերազմակից ըլլաք ձեր աղօթքներուն մէջ առ Աստուած ինծի համար, 31Որպէս զի Հրէաստանի մէջ հաւատքի չհնազանդողներէն ազատուիմ, ու իմ Երուսաղէմ ընելու սպասաւորութիւնս սուրբերուն ընդունելի ըլլայ, 32Որպէս զի Աստուծոյ կամքովը ուրախութեամբ ձեզի գալով՝ ձեզի հետ հանգչիմ։ Եւ խաղաղութեան Աստուածը ձեր ամէնուդ հետ ըլլայ։ Ամէն։