Աստուծով արդարանալ

1Ուստի մենք հաւատքով արդարացած ըլլալով՝ խաղաղութիւն ունինք Աստուծոյ հետ մեր Տէրոջը Յիսուս Քրիստոսի ձեռքով: 2Որուն միջոցով ընդունեցինք հաւատքով այս շնորհքին մոտենալն ալ, որուն մէջ կեցեր ենք, և Աստուծոյ փառքին յուսովը կը պարծինք։ 3Եւ ոչ միայն այսքան՝ հապա նաև նեղութիւններու մէջ կը պարծինք, վասն զի գիտենք թէ նեղութիւնը համբերութիւն կը գործէ, 4Եւ համբերութիւնը՝ փորձառութիւն, ու փորձառութիւնը՝ յոյս: 5Եւ յոյսը ամօթով չձգեր, վասն զի Աստուծոյ սէրը մեր սիրտերուն մէջ տարածուած է Հոգւոյն Սրբոյ ձեռքով, որ մեզի տրուեցաւ։ 6Վասն զի երբ մենք դեռ տկար էինք, յարմար ժամանակին Քրիստոս ամբարիշտներուն համար մեռաւ։ 7Վասն զի արդարի մը համար հազիւ կ’ըլլայ որ մէկը մեռնի, (բայց բարի մարդու մը համար՝ կարելի է որ մէկը համարձակի մեռնիլ.) 8Սակայն Աստուած իր սերը զոր մեր վրայ ուներ՝ յայտնեց, որ երբ դեռ մեղաւոր էինք։ 9Քրիստոս մեզի համար մեռաւ, ուրեմն հիմա որ իր արիւնով արդարացանք, ո՜րչափ աւելի իրմով պիտի ազատինք բարկութենէն։ 10Վասն զի եթէ մեր թշնամի եղած ատենը Աստուծոյ հետ հաշտուեցանք իր Որդւոյն մահովը, ո՜րչափ աւելի մեր հաշտուած ատենը պիտի ապրինք անոր կեանքովը։ 11Եւ ոչ միայն այս, հապա Աստուծով կը պարծենանք ալ մեր Տէրոջը Յիսուս Քրիստոսի ձեռքով, որով հիմա հաշտութիւնը ընդունեցինք։

Ադամ և Քրիստոս

12Վասն զի ինչպէս մարդէ մը մեղքը աշխարհ մտաւ, և այն մեղքէն մահը, և այնպէս ամէն մարդոց վրայ տարածուեցաւ մահը, քանզի ամէնը մեղանչեցին։ 13(Վասն զի մինչև օրէնքին ատենը աշխարհի մէջ մեղք կար, բայց մեղք չսեպուիր՝ ուր օրէնք չկայ։ 14Սակայն մահը Ադամէ մինչև Մովսէս թագաւորեց, նաև Ադամի յանցանքին նման չմեղանչողներուն վրայ ալ, որ օրինակ էր անոր որ ետքը պիտի գար։ 15Բայց ոչ թէ ինչպէս յանցանքը՝ այնպէս շնորհքն է, վասն զի եթէ մէկուն յանցանքովը շատեր մեռան, ալ ո՜րչափ աւելի Աստուծոյ շնորհքը և այն պարգևը որ Յիսուս Քրիստոս մէկ մարդուն շնորհքովն է, շատերու վրայ աւելցաւ։ 16Եւ ոչ թէ այս պարգևը այնպես է՝ ինչպէս մէկէն որ մեղանչեց, վասն զի դատաստանը մէկ մեղքէն դատապարտութեան մէջ ձգեց, բայց շնորհքը շատ մեղքերէ արդարութեան տարաւ։ 17Վասն զի եթէ մէկ մարդուն մեղքովը մահը թագաւորեց այն մէկովը, ո՜րչափ աւելի անոնք որ շնորհքի ու արդարութեան պարգևին առատութիւնը կ’առնեն, կեանքի մէջ պիտի թագաւորեն մէկ Յիսուս Քրիստոսի ձեռքով։) 18Ուրեմն ինչպէս մէկուն յանցանքովը բոլոր մարդոց դատապարտութեան վճիռ եղաւ․ այնպէս մէկուն արդարութիւնովը բոլոր մարդոց կեանքի արդարութեան շնորհք եղաւ. 19Վասն զի ինչպէս մէկ մարդուն անհնազանդութիւնովը շատերը մեղավոր եղան, այնպէս մէկուն հնազանդութիւնովը շատերը արդար պիտի ըլլան։ 20Սակայն օրէնքը մէջտեղ ինկաւ որպէս զի յանցանքը շատնայ, բայց ուր աւելի եղաւ մեղքը, ալ աւելի եղաւ շնորհքը: 21Որպէս զի ինչպէս մեղքը թագաւորեց մահով, այնպէս շնորհքը թագաւորէ արդարութիւնով մինչև յաւիտենական կեանքը մեր Տէրոջը Յիսուս Քրիստոսի ձեռքով։