Մեղքին՝ մեéած, բայց կենդանի՝ Քրիստոսին հետ միութեամբ

1Ալ հիմա ի՞նչ պիտի ըսենք, մեղքի մէջ մնա՞նք արդեօք, որպէս զի շնորհքը շատնայ։ 2Քա՛ւ լիցի, մենք որ մեղքին մեռանք, ի՞նչպէս դեռ անոր մէջ կենանք։ 3Չէ՞ք գիտեր, թէ մենք որ Յիսուս Քրիստոսով մկրտուեցանք, անոր մահուանը մկրտուեցանք։ 4Անոր հետ թաղուեցանք մկրտութիւնով մահուան համար, որպէս զի ինչպէս Քրիստոս Հօրը փառքովը յարութիւն առաւ մեռելներէն, այնպէս մենք կեանքի նորոգութեան մէջ պտտինք։ 5Վասն զի եթէ մենք տնկակից եղանք անոր մահուանը նմանութիւնովը, նաև անոր յարութեանը նմանութիւնովն ալ կցորդ պիտի ըլլանք։ 6Զայս գիտնանք որ մեր հին մարդը անոր հետ խաչուեցաւ, որ մեղքի մարմինը փճանայ, որպէս զի ասկէ ետև մեղքի չծառայենք։ 7Վասն զի ան որ մեղքի մեռած է, մեղքէ արդարացած է։ 8Արդ եթէ մենք Քրիստոսի հետ մեռանք, կը հաւատանք որ անոր հետ պիտի ապրինք ալ։ 9Քանզի գիտենք որ Քրիստոս մեռելներէն յարութիւն առած ըլլալով՝ նորէն չմեռնիր, ալ մահը անոր վրայ իշխանութիւն չունի։ 10Վասն զի քանի որ մեռաւ՝ մեղքի մեռաւ մէկ անգամ, և որ կենդանի է՝ Աստուծոյ կենդանի է։ 11Այսպէս դուք ձեր անձերը մեղքի մեռած սեպեցէք, բայց Աստուծոյ կենդանի՝ մեր Տէրոջը Քրիստոս Յիսուսի ձեռքով։ 12Ուստի ա՛լ մեղքը չթագաւորէ ձեր մահկանացու մարմինին վրայ, որ անոր ցանկութիւներուն հնազանդիք։ 13Եւ ձեր անդամները անիրաւութեան գործիք ըլլալու մի ընծայէք մեղքի, հապա ձեր անձերը Աստուծոյ ընծայեցէք, որպէս թէ մեռելներէն ողջնցած, և ձեր անդամները արդարութեան գործիքներ՝ Աստուծոյ։ 14Քանզի մեղքը ձեր վրայ պիտի չիշխէ, վասն զի օրէնքի տակ չէք, հապա շնորհքի տակ։

Արդարութեան ծառաները

15Ուրեմն ի՞նչ, մե՞ղք գործենք վասն զի օրէնքի տակ չենք, հապա շնորհքի տակ, քա՛ւ լիցի։ 16Չէ՞ք գիտեր թէ որու որ անձերնիդ ծառայ կ’ընծայէք հնազանդելու, ծառայ էք անոր՝ որու որ կը հնազանդիք, թէ՛ մեղքի՝ որ մահուան կը տանի, և թէ՛ հնազանդելու՝ որ արդարութեան։ 17Բայց գոհութիւն Աստուծոյ, որ թեև դուք մեղքի ծառայ էիք, սակայն սրտանց հնազանդեցաք այն վարդապետութեան գաղափարին որ ձեզի յանձնուեցաւ։ 18Ուստի դուք մեղքէ ազատ ըլլալով՝ արդարութեան ծառայ եղաք: 19(Մարդու սովորութեան պէս կ’ըսեմ՝ ձեր մարմինին տկարութեանը համար,) քանզի ինչպէս ձեր անդամները անօրէնութեան համար ընծայեցիք՝ պղծութեան և անօրէնութեան ծառաներ ըլլալու, այնպէս հիմա ձեր անդամները սրբութեան համար ընծայեցէք՝ արդարութեան ծառաներ ըլլալու։ 20Վասն զի երբ դուք մեղքի ծառաներ էիք, արդարութենէ ազատ էիք։ 21Ուրեմն այն ժամանակ ի՞նչ պտուղ ունէիք այն բաներէն՝ որոնցմով հիմա կ’ամչնաք, վասն զի անոնց վերջը մահ է։ 22Բայց հիմա մեղքէ ազատուած և Աստուծոյ ծառաներ եղած՝ ձեր պտուղը ունիք սրբութիւնով, ու վերջը յաւիտենական կեանք։ 23Քանզի մեղքին վարձքը մահ է, բայց Աստուծոյ ձրի պարգևը յաւիտենական կեանք՝ մեր Տէրոջը Յիսուս Քրիստոսի ձեռքով։