Հռութ Բոոսի արտին մէջ կ’աշխատի

1Եւ Նոեմի իր էրկանը կողմանէ ազգական մը ունէր. անիկա Ելիմելէքի ազգատոհմէն էր, ու շատ հարուստ մարդ մըն էր, և անոր անունը Բոոս էր։ 2Ու Մովաբացի Հռութ Նոեմիի ըսաւ, Արտերը երթամ, և որուն աչքին առջև ողորմութիւն գտնելու ըլլամ, անոր ետեւէն երթամ ու հասկեր ժողվեմ։ Եւ անիկա ըսաւ անոր, Գնա, աղջիկս։ 3Ու անիկա գնաց, և արտի մը մէջ մտնելով հնձողներուն ետեւէն հասկ կը ժողվէր. ու այնպէս պատահեցաւ որ անիկա Ելիմելէքի ազգատոհմէն եղող Բոոսի արտին մէջ գտնուեցաւ։ 4Եւ ահա Բոոս Բեթլէհէմէ եկաւ, ու հնձողներուն ըսաւ, Տէրը ձեզի հետ ըլլայ։ Եւ անոնք ըսին, Տէրը քեզ օրհնէ։ 5Ու Բոոս հնձողներուն վրայ կեցող իր մանչուն ըսաւ, Այս աղջիկը որո՞ւնն է։ 6Եւ հնձողներուն վերակացու մանչը պատասխան տուաւ ու ըսաւ, Նոեմիի հետ Մովաբի երկրէն դարձող Մովաբացի աղջիկն է. 7Եւ մեզի ըսաւ, Կ’աղաչեմ, որաներուն մէջ հնձողներուն ետեւէն հասկ քաղեմ ու ժողվեմ. ու անիկա առտուանց կանուխ եկաւ, ու մինչև հիմա կեցաւ, միայն թէ հիմա քիչ մը տունը նստաւ։ 8Եւ Բոոս ըսաւ Հռութի, Մտիկ ըրէ, աղջիկս. հասկ ժողվելու համար ուրիշին արտը չերթաս, ու այս տեղէն ալ չզատուիս, հապա հոս իմ աղջիկներուս քով կենաս. 9Քու աչքերդ անոնց հնձած արտին վրայ ըլլան, ու անոնց ետեւէն գնա. ահա մանչերուն ապսպրեր եմ որ քեզի չդպչին. ու երբ ծարւիս՝ ամաններուն քով գնա, ու մանչերուն քաշած ջուրեն խմէ։ 10Եւ աղջիկը երեսի վրայ ինկաւ, ու գետնէն երկրպագութիւն ընելով՝ անոր ըսաւ, Ինչէ՞ն է որ ես քու աչքերուդ առջև շնորհք կը գտնեմ, ու դուն ինծի հետ ծանօթութիւն կ’ընես. որովհետև ես օտար կին մըն եմ։ 11Եւ Բոոս պատասխան տուաւ ու անոր ըսաւ, Քու էրկանդ մեռնելէն ետքը դուն քու կեսրոջդ ինչ որ ըրիր՝ բոլորն ալ պատմեցին ինծի, և թէ ի՛նչպէս քու հայրդ ու մայրդ և ծննդեանդ երկիրդ թողուցիր, ու եկար այն ժողովուրդին՝ զոր առաջուընէ չէիր ճանչնար։ 12Քու գոիծիդ փոխարէն Տէրը հատուցում ընէ, և քու վարձքդ Իսրայէլի Տէր Աստուծոյն կողմանէ առատապէս տրուի, քանզի դուն եկար որպէս զի անոր թեւերուն տակ ապաստանարան մը գտնես։ 13Ու անիկա ըսաւ, Ով տէր իմ, քու աչքերուդ առջև շնորհք գտնեմ. քանզի դուն զիս մխիթարեցիր, ու քու աղախինիդ քաղցրութեամբ խօսեցար, թէպէտև ես քու աղախիններէդ մէկուն պէս ալ չեմ։ 14Եւ Բոոս կերակուրի ատեն անոր ըսաւ, Հոս եկուր, ու հացէն կեր և պատառդ քացախին մէջ թաթխէ։ Ուստի անիկա հնձողներուն քով նստաւ. ու անոր բոհրած ցորեն տուաւ, ու ան ալ կերաւ կշտացաւ և աւելցածը պահեց։ 15Ու երբ հասկ ժողվելու ելաւ, Բոոս իր մանչերուն պատուիրելով՝ ըսաւ, Թող որաներուն մէջէն ալ ժողվէ, ու զանիկա մի ամչցնէք: 16Եւ խուրձերէն ալ անոր համար գետինը ձգեցէք, ու թող տուէք որ ժողվէ, և զանիկա մի յանդիմանէք։ 17Ու անիկա մինչև իրիկուն այն արտին մէջ մնալով հասկեր ժողվեց. ու երբ ժողվածը ծեծեց, մէկ արդուի չափ գարի եղաւ։ 18Եւ զանիկա առաւ ու քաղաքը մտաւ, և կեսուրը անոր ժողվածը տեսաւ. ու Հռութ հանեց այն իր կշտացածէն աւելցածը անոր տուաւ։ 19Եւ կեսուրը անոր ըսաւ, Այսօր ուրկէ՞ հասկ ժողվեցիր, և ո՞ւր բանեցար. քեզի ճանչուորութիւն ընողը օրհնեալ ըլլայ։ Այն ատեն անիկա իր կեսրոջ իմացուց թէ որո՛ւ քով բաներ է, ու ըսաւ, Այն մարդը, որուն քով ես այսօր բանեցայ, Բոոս կը կոչուի 20Եւ Նոեմի իր հարսին ըսաւ, Անիկա Տէրոջմէն օրհնեալ ըլլայ, որ կենդանիներէն ու մեռածներէն իր ողորմութիւնը չկտրեց. և Նոեմի անոր ըսաւ, Այն մարդը մեր ազգատոհմէն է, անիկա մօտ ազգական է մեզի։ 21Ու Մովաբացի Հռութ ըսաւ, Անիկա նաև ինծի ըսավ թէ իմ մանչերուս քովէն չզատուիս, մինչև որ անոնք իմ բոլոր հունձքս լմնցնեն։ 22Եւ Նոեմի իր հարսին Հռութի ըսաւ, Աղէկ է, աղջիկս, որ դուն անոր աղջիկներուն հետ ելլես, ու քեզ ուրիշ արտի մը մէջ չտեսնեն։ 23Եւ անիկա Բոոսի աղջիկներէն չզատուեցաւ. ու մինչև գարիին հունձքին և ցորենին հունձքին լմննալը հասկ ժողվեց, ու իր կեսրոջ քով կը բնակէր։