Բոոս կ’ամուսնանայ Հռութին հետ

1Եւ Բոոս դուռը ելաւ ու հոն նստաւ. և ահա այն Բոոսի ըսած ազգականը կ’անցնէր. ու Բոոս անունովը կանչեց զանիկա ու ըսաւ, Եկուր, հոս նստէ. և անիկա դարձաւ ու նստաւ: 2Այն ատեն անիկա քաղաքին ծերերէն տասը մարդ առաւ, ու անոնց ըսաւ, Այս տեղ նստեցէք. և անոնք նստան: 3Ետքը այն ազգականին ըսաւ, Մովաբի երկրէն դարձող Նոեմին մեր եղբօրը Ելիմելէքի արտին բաժինը ծախելու վրայ է. 4Ու ես մտածեցի որ քեզի իմացնեմ ու ըսեմ, Զանիկա այս նստողներուն առջև ու իմ ժողովուրդիս ծերերուն առջև ծախու առ. եթէ ազգականութեան իրաւունքով զանիկա ծախու առնել կ’ուզես, ծախու առ. բայց եթէ ծախու առնել չես ուզեր, ինծի իմացուր որպէս զի գիտնամ. քանզի քեզմէ զատ ազգականութեան իրաւունքը կատարելու մէկը չկայ, ու քեզմէ ետքը ես եմ: Եւ անիկա ըսաւ, Ես ազգականութեան իրաւունքը կը կատարեմ: 5Ու Բոոս ըսաւ, Դուն Նոեմիի ձեռքէն արտը ծախու առած օրդ՝ մեռնողին կնոջմէն, Մովաբացի Հռութէ, ալ ծախու առնելու ես, որպէս զի մեռնողին անունը պահես իր ժառանգութեանը մէջ: 6Եւ ազգականը ըսաւ, Ես իմ ազգականութեանս իրաւունքը չեմ կրնար կատարել, չըլլայ որ իմ ժառանգութիւնս աւրեմ. իմ ունեցած ազգականութեանս իրաւունքը դուն կատաէ, քանզի ես չեմ կրնար կատարել: 7Ու Իսրայէլի մէջ առաջ այս սովորութիւնը կար փրկելու ու ծախու առնելու գործերուն մէջ՝ ամէն բան հաստատելու համար, մարդը իր կօշիկը կը հանէր ու իր ընկերին կու տար. և ասիկա Իսրայէլի մէջ վկայութիւն կ’ըլլար: 8Ուստի ազգականը Բոոսի ըսաւ, Դուն ծախու առ. ու իր կօշիկը հանեց: 9Եւ Բոոս ծերերուն ու բոլոր ժողովուրդին ըսաւ, Դուք այսօր վկայ էք, որ ես Ելիմելէքի բոլոր ստացուածքը, ու Քելլոնի և Մաալոնի բոլոր բոլոր ստացուածքը Նոեմիի ձեռքէն ծախու առի. 10Ու Մաալոնի կինը, Մովաբացի Հռութն, ալ ինծի կին առի, որպէս զի մեռնողին անունը պահեմ իր ժառանգութեանը մէջ, ու մեռնողին անունը իր եղբայրներէն ու իր բնակարանին դռնէն չվերնայ. դուք այս բանին համար այսօր վկայ էք: 11Այն ատեն դուռը եղող բոլոր ժողովուրդը ու ծերերը ըսին, Վկայ ենք. Տէրը քու տունդ մտնող կինը Ռաքէլի ու Լիայի պէս ընէ, որոնք երկուքը Իսրայէլի տունը շինեցին. և դուն Եփրաթայի մէջ ուժովցիր, ու Բեթլէհէմի մէջ անուն վաստակէ: 12Ու քու տունդ Փարէսի տանը պէս ըլլայ, զոր Թամար ծնաւ Յուդայի, այն սերունդով՝ զոր Տէրը պիտի տայ քեզի այս նորահասակ կնոջմէն:

Բոոս և իր սերունդը

13Եւ Բոոս Հռութը առաւ, որ իրեն կին եղաւ, ու անոր մտաւ. և Տէրոջը ողորմութիւնովը յղացաւ ու որդի մը ծնաւ: 14Եւ կիները Նոեմիի ըսին, Օրհնեալ ըլլայ Տէրը, որ այսօր քեզ առանց մօտ ազգականի չթողուց, որպէս զի անոր անունը Իսրայէլի մէջ յիշուի. 15Ու ասիկա քու հոգւոյդ մխիթարութիւնը և ծերութեանդ գաւազանը ըլլայ. քանզի զանիկա քեզ սիրող հարսդ ծնաւ, որ քեզի եօթը որդիէ աղէկ է: 16Ու Նոեմի տղան առաւ՝ իր գիրկը դրաւ, և անոր դայեակը եղաւ: 17Եւ դրացի կիները անոր անուն դրին՝ ըսելով, Նոեմիի որդի մը ծնաւ, և անոր անունը Ովբէդ կոչեցին. ասիկա Դաւիթի հօրը Յեսսէի հայրն էր: 18Եւ Փարէսի ծնունդները ասոնք են. Փարէս ծնաւ Եսրոնը, 19Ու Եսրոն ծնաւ Արամը, և Արամ ծնաւ Ամինադաբը, 20Ու Ամինադաբ ծնաւ Նաասոնը, և Նաասոն ծնաւ Սաղմոնը, 21Ու Սաղմոն ծնաւ Բոոսը, և Բոոս ծնաւ Ովբէդը, 22Ու Ովբէդ ծնաւ Յեսսէն, և Յեսսէ ծնաւ Դաւիթը: