ՄԱՐԴԸ

2Ինչպէս շուշանը փուշերուն մէջ՝ Այնպէս է իմ սիրուհիս աղջիկներուն մէջ։

ԿԻՆԸ

3Ինչպէս խնձորենին անտառի ծառերուն մէջ՝ Այնպէս է իմ սիրականս երիտասարդներուն մէջ. Անոր հովանիին տակ ախորժելով նստայ, Ու անոր պտուղը իմ քիմքիս քաղցր է։ 4Զիս խնճոյքին տունը բերաւ, Եւ անոր դրօշը իմ վրաս սէր էր։ 5Զիս կարկանդակներով զօրացուցէք, Զիս խնձորներով ուժովցուցէք, Վասն զի ես սիրով կը նուաղիմ։ 6Անոր ձախ ձեռքը իմ գլխուս տակ ըլլայ, Ու աջ ձեռքը զիս գրկէ։

ՄԱՐԴԸ

7Ով Երուսաղէմի աղջիկներ, Ձեզ այծեամներով կամ դաշտի եղնիկներով կ’երդմնցնեմ, Որ սիրուհին չվերցնէք ու չարթնցնէք, Մինչև որ ինք չուզէ:

Երկրորդ երգ

ԿԻՆԸ

8Իմ սիրականիս ձայնն է. Ահա անիկա լեռներուն վրայէն ցաթկելով, Ու բլուրներուն վրայէն ցաթկըտելով կու գայ։ 9Իմ սիրականս այծեամի կամ եղնիկի ձագի կը նմանի. Ահա հիմա մեր պատին ետևը կայներ է, Պատուհաններէն կը նայի, Վանդակներէն կ’երևնայ։ 10Իմ սիրականս պատասխան տալով՝ ինծի ըսաւ, Ելիր, ով սիրուհիս, ով գեղեցիկս, ու եկուր.

ՄԱՐԴԸ

11Քանզի ահա ձմեռը անցաւ, Անձրևները անցան գացին. 12Գետնի վրայ ծաղիկներ կ’երևնան, Յօտելու ժամանակը հասաւ, Ու մեր երկրին վրայ տատրակին ձայնը կը լսուի։ 13Ահա թզենին իր թուզերը կը հասցնէ, Ու որթերը ծաղկեցան և իրենց հոտը կու տան. Ելիր, ով սիրուհիս, ով գեղեցիկս, ու եկուր։ 14Ով իմ աղաւնիս, վէմին խոռոչներուն մէջ, Ապառաժին հովանիին տակ եկուր. Ինծի երեսդ ցուցուր, ձայնդ ինծի լսել տուր. Քանզի ձայնդ քաղցր ու դէմքդ գեղեցիկ է։ 15Բռնեցէք մեզի աղուէսները. Այգիները աւրող պզտիկ աղուէսները. Վասն զի մեր այգիները ծաղկեր են։

ԿԻՆԸ

16Իմ սիրականս իմս է, ու ես անորն եմ. Անիկա իր հօտը շուշաններու մէջ կ’արածէ։ 17Օրուան հովը չփչած՝ու ստուերները չհեռացած՝ Դարձիր, ով իմ սիրականս, Ու Բեթերի լեռներուն վրայի այծեամին պէս Կամ եղնիկներու ձագին պէս եղիր։