Քրիստոնեական կենցաղավարութիւն

1Անոնց միտքը ձգէ իշխանութիւններուն և պետութիւններուն հնազանդիլ ու հպատակ ըլլալ, ու ամէն բարի գործերու պատրաստ գտնուիլ. 2Մէկո°ւն հայհոյութիւն չընել, կռուարար չըլլալ, հապա հեզահոգի, ամէն մարդոց բոլորովին քաղցրութիւն ցուցնել: 3Վասն զի մենք ալ ատեն մը անմիտ էինք, անհնազանդ, մոլորեալ, և զանազան ցանկութիւններու ու հեշտութիւններու կը ծառայէինք. չարութիւնով ու նախանձով կը վարուէինք, ատելի էինք և մէկզմէկ կ’ատէինք, 4Բայց երբ մեր Փրկիչ Աստուծոյն քաղցրութիւնը ու մարդասիրութիւնը յայտնուեցաւ, 5Ոչ թէ արդարութեան գործերէն` զորոնք մենք ըրինք, հապա իր ողորմութեանը համեմատ մեզ փրկեց նորէն ծնանելու աւազանին միջոցաւ ու Սուրբ Հոգիին նորոգելովը, 6Զոր առատօրէն թափեց մեր վրայ Յիսուս Քրիստոս մեր Փրկչին ձեռքով, 7Որպէս զի անոր շնորհքովը արդարացած` յաւիտենական կեանքի յոյսով ժառանգ ըլլանք: 8Այս խօսքը հաւատարիմ է. և կ’ուզեմ որ ասոնք հաստատես, որպէս զի Աստուծոյ հաւատացողները հոգ տանին բարի գործեր ընելու վրայ ըլլալ. ասոնք են բարի ու մարդոց օգտակար բաները: 9Բայց դուն յիմարական վէճերէն ու ազգահամարներէն ու հակառակութիւններէն և օրէնքի վրայով եղած կռիւներէն մէկդի կեցիր, վասն զի անօգուտ են ու սնոտի: 10Հերձուածող մարդէ` առաջին ու երկրորդ անգամ խրատելէ ետև ետ քաշուէ, 11Գիտնալով որ այնպիսին խոտորած է, և մեղք կը գործէ ինքզինք դատապարտելով:

Վերջին յորդորներ

12Երբ Արտեման կամ Տիւքիկոսը քեզի ղրկեմ, ջանք ըրէ ինծի գալ Նիկոպոլիս, վասն զի միտքս դրի ձմեռը հոն անցնել: 13Զենաս օրինականը ու Ապողոսը փութով ճամբայ դիր, հոգ տանելով որ անոնց բա°ն մը չպակսի: 14Եւ մերիններն ալ թող սորվին բարի գործեր ընելու վրայ ըլլալ հարկաւոր պարագաներու մէջ, որպէս զի անպտուղ չըլլան: 15Բարև կ’ընեն քեզի ամէնն ալ որ ինծի հետ են. բարև տուր անոնց որ մեզ կը սիրեն հաւատքով. շնորհքը ձեր ամէնուն հետ ըլլայ: Ամէն: