Մեծ քահանային տեսիլքը

1Եւ Տէրը ինծի ցուցուց մեծ քահանան Յեսուն, որ Տէրոջը հրեշտակին առջև կայներ էր, ու Սատանայ անոր աջ կողմը կայներ էր` անոր դէմ դնելու համար: 2Եւ Տէրը Սատանայի ըսաւ, Տէրը քեզ յանդիմանէ, ով Սատանայ, ու քեզ Երուսաղէմը ընտրող Տէրը յանդիմանէ. միթէ ասիկա կրակէ հանուած խանձող չէ՞: 3Եւ Յեսու աղտոտ հանդերձներ հագեր էր, ու հրեշտակին առջև կը կայնէր: 4Եւ իր առջև կայնողներուն պատասխան տուաւ, ու խօսեցաւ` ըսելով, Աղտոտ հանդերձները ատոր վրայէն հանեցէք. և անոր ըսաւ, Նայէ, քու անօրէնութիւնդ վրայէդ վերցուցի, ու քեզի պատուական զգեստներ պիտի հագցնեմ: 5Ու ես ըսի որ անոր գլուխը մաքուր խոյր դնեն. և անոր գլուխը մաքուր խոյրը դրին, ու անոր հանդերձներ հագցուցին, ու Տէրոջը հրեշտակը կայներ էր: 6Եւ Տէրոջը հրեշտակը Յեսուի վկայութիւն ըրաւ ու ըսաւ, 7Զօրաց Տէրը այսպէս կ’ըսէ. Եթէ իմ ճամբաներուս մէջ քալես ու իմ պահպանութիւնս պահես, այն ատեն դուն ալ իմ տունս պիտի դատես և իմ սրահներս ալ պիտի պահես, ու քեզի այս ներկայ գտնուողներուն մէջէն առաջնորդներ* պիտի տամ: 8Հիմա մտիկ ըրէ, ով Յեսու մեծ քահանայ, դուն ու քու առջևդ նստող բարեկամներդ, քանզի անոնք նշան ըլլալու մարդիկ են. վասն զի ահա ես իմ ծառաս Շառաւիղը պիտի բերեմ: 9Քանզի ահա Յեսուի առջև դրած քարս, այն մէկ քարին վրայ եօթը աչք պիտի ըլլայ. ահա որ անոր փորագրութիւնը պիտի փորագրեմ, կ’ըսէ զօրաց Տէրը, և այն երկրին անօրէնութիւնը մէկ օրուան մէջ պիտի վերցնեմ: 10Այն օրը, կ’ըսէ զօրաց Տէրը, ձեզմէ ամէն մէկը իր դրացին որթի տակ ու թզենիի տակ պիտի կանչէ: