Աշտանակին տեսիլքը

1Ու ինծի հետ խօսող հրեշտակը դարձաւ, և զիս իր քունէն արթնցող մարդու պէս արթնցուց: 2Ու ինծի ըսաւ, Ի՞նչ կը տեսնես. ու ըսի, Կը տեսնեմ որ ահա բոլորովին ոսկիէ աշտանակ մը կայ, ու անոր վրայ բաժակ մը` և անոր վրայ եօթը ճրագ` ու անոր վրայի եօթը ճրագներուն համար եօթը խողովակ կայ. 3Եւ անոր քով երկու ձիթենի կայ, մէկը բաժակին աջ կողմէն` ու միւսը ձախ կողմէն: 4Եւ պատասխան տուի, ու ինծի հետ խօսող հրեշտակին խօսեցայ ու ըսի, Ասոնք ի՞նչ են, ով տէր իմ: 5Ու ինծի հետ խօսող հրեշտակը պատասխան տուաւ ու ինծի ըսաւ, Ասոնց ինչ ըլլալը չե՞ս գիտեր. ու ես ըսի, Ոչ, ով տէր իմ:

Աստուծոյ խոստումը Զօրաբաբէլի

6Եւ պատասխան տուաւ ու ինծի խօսեցաւ` ըսելով, Այս է Տէրոջը խօսքը որ Զօրաբաբէլի կ’ըսուի. Զօրութեամբ չէ, և ուժով չէ, Հապա իմ Հոգւովս, կ’ըսէ զօրաց Տէրը: 7Դուն, ով մեծ լեռ, ո՞վ ես. Զօրաբաբէլի առջև դաշտ պիտի ըլլաս. Ու գլուխի քարը ինք պիտի հանէ, Ու պիտի աղաղակեն, Շնորհք, շնորհք անոր: 8Դարձեալ Տէրոջը խօսքը ինծի եղաւ` ըսելով, 9Այս տունը Զօրաբաբէլի ձեռքերը հիմնեցին, Եւ անոր ձեռքերը պիտի կատարեն զանիկա, Ու պիտի գիտնաս որ զօրաց Տէրը զիս ձեզի ղրկած է: 10Քանզի պզտիկ բաներուն օրը ո՞վ անարգեց. Վասն զի այն եօթը աչքերը ուրախութեամբ պիտի տեսնեն գնտակը Զօրաբաբէլի ձեռքին մէջ. Անոնք Տէրոջը աչքերն են, որոնք բոլոր երկրի մէջ կը պտըտին: 11Եւ ես պատասխան տուի ու անոր ըսի, Աշտանակին աջ կողմը ու անոր ձախ կողմը եղող այս երկու ձիթենիները ի՞նչ են: 12Ու երկրորդ անգամ պատասխան տուի ու անոր ըսի, Երկու ոսկի խողովակներուն միջոցով իւղը իրենցմէ ոսկիի պէս թափող երկու ձիթենիի ոստերը ի՞նչ են: 13Եւ ինծի խօսեցաւ ու ըսաւ, Ասոնց ինչ ըլլալը չե՞ս գիտեր. ու ես ըսի, Ոչ, ով տէր իմ: 14Ու ըսաւ, Ասոնք երկու օծեալներն են` որոնք բոլոր երկրի Տէրոջը առջև կը կայնին: