Չորս կառքերուն տեսիլքը

1Եւ դարձայ ու աչքերս վերցուցի ու տեսայ, և ահա երկու լեռներու մէջէն չորս կառք կ’ելլէր, ու լեռները պղնձէ լեռներ էին: 2Առաջին կառքին աշխէտ ձիեր լծուած էին, ու երկրորդ կառքին` սև ձիեր, 3Ու երրորդ կառքին` ճերմակ ձիեր, և չորրորդ կառքին` պիսակ ու գորշագոյն ձիեր: 4Եւ պատասխան տուի, ու ինծի հետ խօսող հրեշտակին ըսի, Ասոնք ի՞նչ են, ով տէր իմ: 5Եւ հրեշտակը պատասխան տուաւ ու ինծի ըսաւ, Ասոնք երկինքի չորս հովերուն հոգիներն են, որոնք բոլոր երկրի Տէրոջը առջև կայնելէն կ’ելլեն. 6Սև ձիերը` որ այն կառքին լծուած են, հիւսիսի երկիրը կ’ելլեն, ու ճերմակները անոնց ետևէն կ’ելլեն, ու պիսակները հարաւի երկիրը կ’ելլեն: 7Եւ գորշագոյնները ելան, և ուզեցին որ երթան ու երկրի վրայ պտըտին. և անիկա ըսաւ, Գացէք, երկրի վրայ պտըտեցէք. ու անոնք երկրի վրայ պտըտեցան: 8Եւ անիկա ինծի աղաղակեց ու ինծի խօսեցաւ` ըսելով, Նայէ, հիւսիսի երկիրը ելլողները իմ հոգիս հիւսիսային երկրին մէջ հանգչեցուցին:

Հրաման Յովսիան պսակելու

9Դարձեալ Տէրոջը խօսքը ինծի եղաւ` ըսելով, 10Գերութենէ դարձողներէն, Հեղդայէ, Տուբիայէ ու Յեդայիայէ առ, ու նոյն օրը գնա Բաբելոնէ եկող Սոփոնիայի որդւոյն Յովսիայի տունը մտիր. 11Արծաթ ու ոսկի առ ու պսակներ շինէ, ու մեծ քահանային Յովսեդեկեան Յեսուի գլուխը դիր. 12Եւ անոր խօսէ ըսելով, Զօրաց Տէրը կը խօսի ու այսպէս կ’ըսէ. Ահա այն մարդը, որուն անունը Շառաւիղ է. Անիկա իր տեղէն պիտի բուսնի, Ու Տէրոջը տաճարը պիտի շինէ: 13Անիկա պիտի շինէ Տէրոջը տաճարը, Ու պատիւ պիտի ունենայ, Եւ իր աթոռին վրայ նստելով` իշխանութիւն պիտի վարէ, Ու քահանայ պիտի ըլլայ իր աթոռին վրայ. Ու երկուքին մէջտեղ խաղաղութեան խորհուրդ պիտի ըլլայ: 14Եւ պսակները Հելէմի, Տուբիայի ու Յեդայիայի և Եսփոնիայի որդւոյն Հենի պիտի ըլլան` Տէրոջը տաճարին մէջ յիշատակ ըլլալու համար: 15Եւ հեռուն եղողները պիտի գան, ու Տէրոջը տաճարին մէջ պիտի շինեն, և պիտի գիտնաք որ զօրաց Տէրը զիս ձեզի ղրկեր է. ու ասիկա պիտի ըլլայ` եթէ ուշադրութեամբ ձեր Տէր Աստուծոյն ձայնին մտիկ ընէք: