Աստուած կեղծ ծոմապահութիւնը կը յանդիմանէ

1Ու եղաւ որ Դարեհ թագաւորին չորրորդ տարին, իններորդ ամսուն, այսինքն Քասղևին, չորրորդ օրը, Տէրոջը խօսքը Զաքարիայի եղաւ, 2Երբ Սարասար ու Ռեկէմմելէք և անոնց մարդիկը Աստուծոյ տունը ղրկուեցան, որպէս զի Տէրոջը առջև աղօթք ընեն, 3Ու զօրաց Տէրոջը տանը մէջ եղող քահանաներուն ու մարգարէներուն խօսին ու ըսեն, Արդեօք հինգերորդ ամսուն մէջ իմ անձս զատելով լա՞մ, ինչպէս այսչափ տարիներ ըրի. 4Այն ատեն զօրաց Տէրոջը խօսքը ինծի եղաւ` ըսելով, 5Այս երկրին բոլոր ժողովուրդին ու քահանաներուն խօսէ ու ըսէ, Այս եօթանասուն տարին, երբ հինգերորդ ու եօթներորդ ամիսներուն մէջ ծոմապահութիւն կ’ընէիք ու սուգ կը բռնէիք, միթէ ինծի՞ համար ծոմապահութիւն կ’ընէիք: 6Ու երբ կ’ուտէիք ու կը խմէիք, ձեզի համար չէի՞ք ուտեր ու ձեզի համար չէի՞ք խմեր: 7Ասոնք չե՞ն այն խօսքերը` զորոնք Տէրը առաջուան մարգարէներուն ձեռքով հրատարակեց, երբ Երուսաղէմ ու անոր շրջակայ քաղաքները բնակուած ու հանգիստ էին, և հարաւային ու դաշտային կողմերը բնակուած էին:

Անհնազանդութիւնը աքսորին պատճառ

8Դարձեալ Տէրոջը խօսքը Զաքարիայի եղաւ` ըսելով, 9Զօրաց Տէրը այսպէս խօսեցաւ ու ըսաւ. Արդար դատաստան տեսէք, և ձեզմէ ամէն մէկը իր եղբօրը ողորմութիւն ու գթութիւն ընէ. 10Եւ որբևարին ու որբը, օտարականը և տնանկը մի հարստահարէք, ու բնաւ մէկը իր եղբօրը համար իր սրտին մէջ չարութիւն չմտածէ. 11Բայց անոնք չուզեցին մտիկ ընել, հապա իրենց ուսը ետ քաշեցին, և ականջնին ծանրացուցին որպէս զի չլսեն. 12Ու իրենց սիրտը ադամանդի պէս ըրին, որպէս զի չլսեն այն օրէնքը ու այն խօսքերը` զորոնք զօրաց Տէրը իր Հոգւովը առաջուան մարգարէներուն ձեռքով անոնց ղրկեց. անոր համար զօրաց Տէրոջը կողմանէ մեծ բարկութիւն եղաւ: 13Ու եղաւ որ ինչպէս անիկա կանչեց ու անոնք մտիկ չըրին, այնպէս անոնք կանչեցին ու ես մտիկ չըրի, կ’ըսէ զօրաց Տէրը. 14Հապա զանոնք իրենց չգիտցած բոլոր ազգերուն մէջ փոթորիկով ցրուեցի, և անոնց ետևէն երկիրը անցնողէ ու դարձողէ ամայի մնաց. այնպէս ցանկալի երկիրը ամայի ըրին: